१०औँ खुल्ला राष्ट्रिय कराते प्रतियोगितामा गौरीगंगा कराते डोजो टिमतर्फ तेस्रो
काठमाडौं । नेपाल गोजुरीयो कराते–दो संघको आयोजनामा राजधानी काठमाडौंस्थित दशरथ रंगशालामा सम्पन्न १०औँ खुल्ला राष्ट्रिय कराते प्रतियोगिता उत्साहपूर्ण वातावरणका बीच सफलतापूर्वक सम्पन्न भएको छ। देशभरका उत्कृष्ट कराते खेलाडीहरूको सहभागिता रहेको उक्त प्रतियोगितामा सुदूरपश्चिम प्रदेशको प्रतिनिधित्व गर्दै सहभागी गौरीगंगा कराते डोजोले ऐतिहासिक सफलता हात पार्दै ६ स्वर्ण, १ रजत र २ कास्य पदकसहित टिमतर्फ तेस्रो स्थान हासिल गर्न सफल भएको छ।
सीमित स्रोतसाधन र विभिन्न अभावका बाबजुद पनि प्रशिक्षक अशोक चन्दको निरन्तर मेहनत, अनुशासित प्रशिक्षण र लगनशीलताको प्रतिफलस्वरूप गौरीगंगा कराते डोजोले पछिल्ला वर्षहरूमा राष्ट्रिय तथा अन्तर्राष्ट्रिय स्तरमा समेत आफ्नो सशक्त उपस्थिति जनाउँदै आएको छ। यस प्रतियोगितामा प्राप्त उपलब्धिले डोजोको निरन्तर प्रगति र प्रशिक्षकको समर्पणलाई थप पुष्टि गरेको खेल क्षेत्रका जानकारहरू बताउँछन्।
प्रतियोगितामा सहभागी गौरीगंगा कराते डोजोका खेलाडीहरूले काता र कुमुते दुवै विधामा उत्कृष्ट सीप, आत्मविश्वास र अनुशासन प्रदर्शन गर्दै निर्णायक तथा दर्शकहरूको मन जित्न सफल भए।
खेलाडीहरूको व्यक्तिगत उपलब्धि यसप्रकार रहेको छः
• राधिका धामी – काता र कुमुते दुवै विधामा उत्कृष्ट प्रदर्शन गर्दै २ स्वर्ण पदक
• मनिषा मास्की मगर – कुमुतेमा १ स्वर्ण र कातामा १ रजत पदक
• आसिका बी.के. – काता र कुमुते दुवै विधामा शानदार खेल प्रदर्शन गर्दै २ स्वर्ण पदक
• पारस बडैला – कुमुते विधामा १ स्वर्ण पदक
• हीमाल मास्की मगर र अर्जुन सार्की – कुमुते विधामा १–१ कास्य पदक
खेलाडीहरूको यो उल्लेखनीय सफलता निरन्तर अभ्यास, प्रशिक्षक अशोक चन्दको समर्पित मार्गदर्शन, अभिभावकहरूको साथ तथा संस्थागत सहयोगको संयुक्त परिणाम भएको बताइएको छ। सीमित साधनस्रोतका बीच राष्ट्रिय स्तरको प्रतियोगितामा यस्तो उत्कृष्ट नतिजा हासिल गर्नु गौरीगंगा कराते डोजो तथा सुदूरपश्चिम प्रदेशका लागि गर्वको विषय बनेको छ।
यस ऐतिहासिक सफलताप्रति सम्पूर्ण खेलाडी, प्रशिक्षक, व्यवस्थापन टिम तथा सहयोगीहरूप्रति हार्दिक बधाई ज्ञापन गर्दै आगामी दिनहरूमा अझ ठूलो सफलता हासिल गर्न शुभकामना व्यक्त गरिएको छ ।
