बझाङ । सुदूरपश्चिम प्रदेश सरकार अन्तर्गत भूमि व्यवस्था, कृषि तथा सहकारी मन्त्रालय मातहत रहेको कृषि विकास निर्देशनालय तथा कृषि ज्ञान केन्द्र बझाङले कार्यालयको स्वामित्वमा रहेको सवारी साधन ब्लक सञ्चालक समितिलाई औपचारिक रूपमा हस्तान्तरण गरेको छ ।
प्रधानमन्त्री कृषि आधुनिकीकरण परियोजना अन्तर्गत तथा तत्कालीन जिल्ला कृषि विकास कार्यालयको नाममा प्राप्त उक्त सवारी साधन किसानलाई सेवा प्रवाहलाई प्रभावकारी बनाउने उद्देश्यले प्रयोग हुँदै आएको थियो । सवारी साधनको नियमित प्रयोग, संरक्षण, मर्मतसम्भार तथा पारदर्शी व्यवस्थापन सुनिश्चित गर्न कृषि ज्ञान केन्द्र बझाङले मिति २०८२/०९/१७ मा गाडी हस्तान्तरण सम्बन्धी सम्झौता पत्र मार्फत समितिलाई जिम्मेवारी प्रदान गरेको हो ।
सम्झौता अनुसार सवारी साधनको प्रयोग पूर्ण रूपमा सरकारी प्रयोजनमा मात्र गरिने, दुरुपयोग वा नियम विपरीत प्रयोग भएको पाइएमा प्रचलित कानुन बमोजिम कारबाही गरिने उल्लेख गरिएको छ । साथै गाडीको सञ्चालन, इन्धन, मर्मत खर्च, लगबुक राख्ने, आम्दानी–खर्चको विवरण तयार गरी ६/६ महिनामा सम्बन्धित कार्यालय तथा कृषि ज्ञान केन्द्रमा प्रतिवेदन पेश गर्ने व्यवस्था गरिएको छ ।
सम्झौता पत्रमा उल्लेख भए अनुसार सवारी साधनको प्रभावकारी उपयोग तथा अनुगमनका लागि सवारी साधन व्यवस्थापन तथा अनुगमन समिति गठन गरिएको छ । समितिको संरचनामा वडा अध्यक्ष, सम्बन्धित पालिकाका संयोजक , कृषि ज्ञान केन्द्र बझाङ सदस्य , अध्यक्ष, सम्बन्धित कृषि विकास समिति सदस्य र कृषि उपज खरिद बिक्री समिति सदस्य प्रमुख सम्बन्धित पालिकाको कृषि शाखा सदस्य सचिव रहने व्यवस्था गरिएको छ ।
कृषि ज्ञान केन्द्र बझाङका अनुसार समितिमार्फत गाडी सञ्चालन हुँदा सरकारी सवारी साधनको सदुपयोग, निगरानी तथा सेवा प्रवाहमा थप प्रभावकारिता आउने अपेक्षा गरिएको छ । गाडी हस्तान्तरण कार्यक्रममा कृषि ज्ञान केन्द्रका प्रमुख, जिल्ला प्रशासन कार्यालयका सहायक सिडिओ, जिल्ला समन्वय समितिका प्रमुख तथा सम्बन्धित कर्मचारीहरूको उपस्थिति रहेको थियो । कार्यक्रमका सहभागीहरूले सरकारी सवारी साधनको सदुपयोगले सेवा प्रवाहलाई अझ प्रभावकारी बनाउने विश्वास व्यक्त गरेका छन् ।
