बझाङ: आगामी २०८२ माघ ११ गते हुने राष्ट्रिय सभा निर्वाचन र फागुन २१ गते तय भएको प्रतिनिधि सभा निर्वाचनले बझाङमा राजनीतिक तापक्रम निकै बढाएको छ । यसैबीच नेपाली काँग्रेस बझाङले लामो छलफल, परामर्श र सर्वसम्मत सहमतिबाट तय गरेको उम्मेदवार सिफारिससूची केन्द्रमा पठाइसकेको छ । विभिन्न पुस्ताका नेताहरूलाई समेटिएको उक्त सूचीमा अनुभवी, निरन्तर जनतामा समर्पित, स्वच्छ र विश्वासिलो छविका नेता सत्यराज भण्डारी विशेषरूपमा अगाडि देखिएका छन् ।
नेपाली काँग्रेस बझाङको राजनीतिक इतिहासमा सत्यराज भण्डारीको नाम अलगै पहिचानका साथ उच्चारण गरिन्छ । करिब पाँच दशकभन्दा बढी समय पार्टीलाई समर्पण गरेका भण्डारी तीन तीन पटक बझाङ जिल्ला सभापति भएर नेतृत्वको पहिचान स्थापित गरिसकेका छन् । २०४९, २०५६ र २०६२ सालको त्यो नेतृत्वकालमा उनले जिल्लाभर काँग्रेसको संगठनलाई मजबुत बनाउनुका साथै स्थानीय तहसम्म जनसञ्जालमा विस्तार ल्याएका थिए । राजनीतिक अस्थिरता, संघर्ष र संक्रमणकालका कठिन समयमा पनि भण्डारीले संयमता, स्वच्छ चरित्र र दृढताको साथ पार्टीलाई अघि बढाएका थिए, जसले गर्दा आजसम्म पनि काँग्रेसभित्र उनको नाम ‘स्वच्छ, अनुशासनबद्ध र नैतिक’ नेताको रूपमा विशेष सम्मानका साथ लिइन्छ ।
भण्डारीको राजनीतिक यात्रामा एउटा यस्तो विशेष पक्ष छ, जसले उहाँलाई थप विशिष्ट बनाइदिन्छ ।अहिलेसम्म उहाँको राजनीतिक जीवनमा कुनै विवाद, दाग वा अनुशासनहीनता जोडिएको छैन । लामो समयको जनसम्पर्क, जनतासँगको नजिकपन र नेतृत्वको परिपक्वताले उनलाई बझाङकै होइन, सुदूरपश्चिमकै आदर्श नेतामध्ये एक बनाएको छ। यद्यपि यो सबै योगदानका बाबजुद पनि भण्डारीलाई अहिलेसम्म उच्च राज्यसत्ता वा जनप्रतिनिधित्वको औपचारिक जिम्मेवारी पाउने समय मिल्न सकेको थिएन । तर यसपटक स्थानीयदेखि केन्द्रसम्म काँग्रेस नेताहरू र कार्यकर्ताहरूले उनलाई सशक्त विकल्प, स्वच्छ छवि र जनभावनामा आधारित उमेदवारका रूपमा अघि बढाएर प्रस्तुत गरेको देखिन्छ ।
राजनीतिमा मात्र होइन, सामाजिक सेवामा पनि सत्यराज भण्डारीको योगदान समान रूपमा प्रशंसनीय छ । २०४५ सालमा नेपाल रेडक्रस सोसाइटी बझाङका जिल्ला सभापति बनेका भण्डारीले त्यसबेलादेखि नै मानवीय क्षेत्रप्रति आफ्नो प्रतिबद्धता देखाएका थिए । पछि उनी रेडक्रसका केन्द्रिय सदस्यसमेत बनेर राष्ट्रिय तहमा सामाजिक परिचय स्थापना गर्न सफल भए । विपदमा, समुदायमा स्वास्थ्य सेवा विस्तार, मानवीय सहयोग, कोभिडको बेला र संकट व्यवस्थापनका क्षेत्रमा उनले देखाएको सक्रियता बझाङका हजारौं नागरिकले आज पनि सम्झन्छन् ।
शिक्षण पेशासँग सुरु भएको उनको सार्वजनिक जीवन पनि उल्लेखनीय छ । वि.स २०३४ साल देखि २०४४ सालसम्म लगभग एक दशकसम्म उनी जयपृथ्वी बहुमुखी क्याम्पसका संस्थापक सदस्य सचिव रहे । स्थापना र विकासका जटिल चरणमै उनले क्याम्पसलाई स्थिर संरचना, शैक्षिक वातावरण र प्रगतिशील दृष्टिकोण दिन महत्वपूर्ण भूमिका खेले । त्यसै समयदेखि उनी जिल्लाको शैक्षिक विकास, युवाको मार्गदर्शन र ज्ञानको पहुँच वृद्धि जस्ता क्षेत्रमा सक्रिय हुँदै आएका थिए । यही पृष्ठभूमिले उनलाई बझाङको भूगोल, समाज, संस्कार, समस्या र जनअपेक्षासँग अत्यन्त निकट बनाएको छ ।
यसै बीच नेपाली कांग्रेस बझाङले यसपटक सिफारिस सूचीमा अनुभवी नेतादेखि सुरूङ्ग फूट्दै आएका नयाँ पुस्ताका नेतृत्वसम्म समावेश गरेको छ । स्थानीय पार्टी संरचनाले जनताकै भावना, कार्यकर्ताहरूको मनोबल र आगामी निर्वाचनमा प्रभावकारी नेतृत्व कसले दिन सक्छ भन्ने आधारमा नामहरू अघि सारे । तर यी सबै नाममध्येको विशेष चर्चा भने सत्यराज भण्डारीकै देखिन्छ । उहाँको दीर्घ अनुभव, स्वच्छ चरित्र, संगठनात्मक क्षमता र जनविश्वासले गर्दा बझाङका स्थानीय बासिन्दाहरू पनि भण्डारीलाई सदाचारिक, सत्यनिष्ठ र जनमुखी नेतृत्वका रूपमा चिनिन्छन् । राजनीतिक यात्राभरि उनले कुनै पद, लाभ वा व्यक्तिगत स्वार्थभन्दा पनि संगठन, विचार र जनताको पक्षमा निरन्तर काम गरेको छ । त्यसैले काँग्रेसभित्र उनको नाम सिफारिस सूचीमा मात्र होइन, व्यापक जनचासो र समर्थनको केन्द्रमा पनि रहेको देखिन्छ ।
आगामी निर्वाचन नजिकिँदै जाँदा नेपाली काँग्रेस बझाङको सिफारिसले जिल्लाको राजनीतिमा नयाँ हलचल ल्याएको छ। पार्टीले सुझाएको नामलाई केन्द्रले कसरी मूल्याङ्कन गर्नेछ र अन्ततः प्रतिनिधि सभा उपनिर्वाचन तथा राष्ट्रिय सभा निर्वाचनमा कसलाई जिम्मेवारी दिनेछ भन्ने प्रतीक्षा अब स्थानीय कार्यकर्ता र जनतामा बढेको छ ।
नेपाली कांग्रेस बझाङले सिफारिस गरेका नामहरु 
