धनगढी। कैलालीको चुरे गाउँपालिका–२ बसन्तपुरका १० वर्षीय योगेन्द्र साउद भिरबाट खसेर गम्भीर घाइते भएका थिए। गोठालो जाने क्रममा भिरबाट खसेपछि टाउकोमा चोट लागेर गम्भीर घाइते भएका बालकका उपचारका लागि स्थानीय युवाहरूले सहयोग अभियान सञ्चालन गरेका छन्।
समाजसेवी मनोज साउदको नेतृत्व र ललित दियाकोटीको सहकार्यमा सञ्चालन गरिएको अभियानमार्फत रु २१ हजार ७९१ रुपैयाँ ४० पैसा संकलन गरी उपचार खर्चका लागि हस्तान्तरण गरिएको हो।
यसैबीच, सोही गाउँपालिकाकी टिकेश्वरी बि.क.का परिवारका लागि पनि सहयोग अभियान सञ्चालन गरिएको छ। सिता देवी बि.क.की छोरी टिकेश्वरी भारतको दिल्ली जाँदै गर्दा उत्तर प्रदेशको साजानपुर नजिकै भएको बस दुर्घटनामा परि निधन भएको थियो। घरको जिम्मेवारी सम्हाल्दै आएकी टिकेश्वरीको निधनपछि परिवार आर्थिक संकटमा परेपछि मनोज साउद र गणेश बि.क.को नेतृत्वमा आर्थिक सहयोग संकलन गरिएको हो।
देश–विदेशमा रहेका सहयोगी दाताहरूबाट जम्मा रु २६ हजार ७९१ रुपैयाँ ६२ पैसा संकलन भएको थियो। त्यसमध्ये रु १७ हजार ४१५ रुपैयाँ सिता देवी बि.क.लाई क्रिया खर्चका लागि हस्तान्तरण गरिएको छ भने बाँकी रकम रु ९ हजार ३७६ रुपैयाँ ६२ पैसा स्थानीय सरकारको रोहवरमा औपचारिक रूपमा हस्तान्तरण गर्ने तयारी भइरहेको छ।
सहयोग अभियानमा मनोज साउद , हुकुमतारा साउद, ललित दियाकोटी, भरत नेपाली, गणेश बि.क., भागरथी बोहरा, चन्द्र बोहरा, प्रेम साउद, बिशाल साउद, देबबहादुर साउद, सिमरन चन्द लगायतले आर्थिक सहयोग गरेका थिए।
