धनगढी- डोटीमा बोलेरो जिप दुर्घटना हुँदा एक महिलाको मृत्यु भएको छ। जिल्लाको बडिकेदार गाउँपालिका–३ देवल भन्ने स्थानमा मंगलबार बिहान भएको दुर्घटनामा सोही गाउँपालिकाकी ३५ वर्षीया लक्ष्मी कुमारी सलामीको मृत्यु भएको जिल्ला प्रहरी कार्यालय, डोटीले जनाएको छ।
कैलालीको सुखडबाट डोटीको देवलतर्फ जाँदै गरेको सु.प.प्र.०१–००१ च ४६५१ नम्बरको बोलेरो जिप सापट भाँचिँदा सडकमा पल्टिँएको प्रहरीले जनाएको छ। जिप कैलालीको घोडाघोडी नगरपालिका–८ मैनापोखरीका २७ वर्षका सरोज विकले चलाइरहेका थिए।
जिपमा नौ जना सवार रहेकामा अन्य आठ जना सकुशल रहेको प्रहरीले जानकारी दिएको छ।
घटनाको थप अनुसन्धानका लागि प्रहरी सहायक निरीक्षक पदमराज भट्टको कमान्डमा चार जनाको टोली खटिएको जिल्ला प्रहरीले जनाएको छ।
