काठमाडौं- पूर्वप्रधानन्यायाधीश सुशीला कार्कीको नेतृत्वमा अन्तरिम सरकार गठनबारे आज (शुक्रबार) पनि छलफल जारी रहने भएको छ।
राष्ट्रपति रामचन्द्र पौडेलले बिहीबार दिनभर र रातभर नेपाली सेनाका प्रधानसेनापति अशोक सिग्देलको समन्वयमा कार्की र संविधानविद्हरुसँग व्यापक छलफल गरेका थिए। तर संसद् विघटन गर्ने कि नगर्ने भन्ने विषयमा सहमति जुट्न नसकेपछि निष्कर्षमा पुग्न सकेन। यस कारण शुक्रबार बिहान ९ बजेदेखि पुनः छलफल सुरु हुने भएको हो।
विश्वसनीय स्रोतका अनुसार, सुशीला कार्कीलाई अन्तरिम सरकारको प्रधानमन्त्री वा मन्त्रिपरिषद् अध्यक्ष बनाउने विषयमा भने सहमति जुटिसकेको छ। तर संवैधानिक प्रावधानअनुसार प्रधानमन्त्री हुन संसद् सदस्य हुनुपर्ने भएकाले वैकल्पिक उपायबारे राष्ट्रपति पौडेलले विज्ञसँग राय लिएका छन्।
जेनजी युवाहरूले संसद् विघटनलाई आफ्नो आधाररेखा (बटमलाइन) बनाएका छन्। उनीहरूको तर्फबाट अधिवक्ता ओमप्रकाश अर्याल छलफलमा सहभागी थिए। अर्याल काठमाडौं महानगरपालिकाका मेयर बालेन शाहका कानुनी सल्लाहकार पनि हुन्।
राष्ट्रपति पौडेलले बिहीबार कांग्रेस नेताहरू र नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ सँग पनि परामर्श गरेका थिए। कांग्रेस नेताहरूले कार्कीलाई अन्तरिम सरकारको नेतृत्व दिन सकिने सुझाव दिएका छन् भने प्रचण्डले पनि सो प्रस्तावप्रति सकारात्मक धारणा व्यक्त गरेका छन्।
यसैबीच, राष्ट्रपति पौडेलले संविधानको धारा ६१ (४) अन्तर्गत रहेको ‘बाधा अड्काउ फुकाऊ’ प्रावधान प्रयोग गर्न सकिने वा नसकिने विषयमा संविधानविद् भीमार्जुन आचार्य, विपिन अधिकारीलगायतसँग पनि छलफल गरेका छन्।
