समीर कठायत,बझाङ- बझाङको छविसपाथिभेरा गाउँपालिका–२ जयपृथ्वी नगर मेल्लेखस्थित सत्यावादी माध्यमिक विद्यालयलाई शनिबार एक विशेष समारोहका बीच शैक्षिक तथा खेलकुद सामग्री हस्तान्तरण गरिएको छ।
१४९ औँ जयपृथ्वी बहादुर सिंहको जन्मजयन्तीको अवसर पारेर राष्ट्रिय स्वतन्त्र पार्टी (रास्वपा) बझाङका जिल्ला सहसचिव तथा संगठन विभाग प्रमुख मुकेश बहादुर ऐडीले आफ्नी स्वर्गीय काकी रुमला ऐडी र भाई उदिप ऐडीको सम्झनामा सामग्री हस्तान्तरण गरेका हुन्।
विद्यालयलाई ९–९ सेट पुरुष तथा महिला खेलकुद पोशाक, ३ वटा भलिबल, १ वटा भलिबल नेट र १ वटा पम्प प्रदान गरिएको विद्यालय प्रशासनले जनाएको छ। सामग्री हस्तान्तरणसँगै विद्यार्थीहरूलाई नियमित शैक्षिक गतिविधिसँगै खेलकुदमा पनि प्रोत्साहन मिल्ने विश्वास विद्यालयका शिक्षकहरूले व्यक्त गरेका छन्।
कार्यक्रमका प्रमुख अतिथि पूर्वमन्त्री भानुभक्त जोशीले शिक्षा र खेलकुदलाई समानान्तर रूपमा अघि बढाउनु विद्यार्थीहरूको जीवनमा अनुशासन, क्षमता र आत्मविश्वास विकासका लागि अपरिहार्य रहेको बताए। उनले यस्ता सहयोगहरूले गाउँ–गाउँका विद्यार्थीलाई थप प्रेरणा दिने उल्लेख गर्दै निरन्तर सहकार्य आवश्यक रहेको धारणा राखे।
सुर्य बहादुर कडायतको अध्यक्षतामा सम्पन्न कार्यक्रममा स्थानीय समाजसेवी, अभिभावक, शिक्षक र विद्यार्थीहरूको उल्लेख्य उपस्थिति रहेको थियो।
सामग्री हस्तान्तरण गर्दै सहसचिव ऐडीले दिवंगत काकी र भाईको सम्झनामा गरिएको यो कार्यले विद्यार्थीहरूलाई खेलकुद तथा शैक्षिक क्षेत्रमा उत्कृष्टता हासिल गर्न प्रेरणा दिने बताए। उनले आगामी दिनमा पनि शिक्षा र खेलकुद क्षेत्रमा निरन्तर सहयोग गर्ने प्रतिबद्धता व्यक्त गरे।
ऐडी बझाङ जिल्ला छविसपाथिभेरा खेलकुद समितिका सक्रिय सदस्य समेत हुन्। उनका अनुसार शिक्षा र खेलकुदलाई सन्तुलित रूपमा अघि बढाउन सके ग्रामीण क्षेत्रका विद्यार्थीहरूले पनि राष्ट्रिय तथा अन्तर्राष्ट्रिय स्तरमा सफलता हासिल गर्न सक्ने विश्वास गरिएको छ।
