काठमाडौँ-देशभर यस वर्ष १ भदौसम्म ९४.१५ प्रतिशत धान रोपाइँ सम्पन्न भएको छ । यो दर गत वर्षको सोही अवधिको ९८.४४ प्रतिशतको तुलनामा करिब ४ प्रतिशत कम हो ।
कृषि तथा पशुपन्छी विकास मन्त्रालयका अनुसार कुल १३ लाख ७६ हजार ४ सय ६६ हेक्टर क्षेत्रफलमध्ये हालसम्म १२ लाख ९५ हजार ८ सय ८७ हेक्टरमा रोपाइँ भएको छ ।
प्रदेशगत तथ्यांकअनुसार, कोशीमा ९४.४२ प्रतिशत, मधेशमा ८६.३५ प्रतिशत, बागमतीमा ९७.२७ प्रतिशत, गण्डकीमा ९४.८३ प्रतिशत, लुम्बिनीमा ९८.०७ प्रतिशत, कर्णालीमा ९९.३४ प्रतिशत र सुदूरपश्चिममा ९९.७२ प्रतिशत रोपाइँ सम्पन्न भएको छ ।
धान उत्पादनको प्रमुख भण्डारका रूपमा चिनिने मधेश प्रदेशमा अन्य प्रदेशको तुलनामा रोपाइँ कम भएको मन्त्रालयले जनाएको छ । सुदूरपश्चिम प्रदेशमा भने कुल १ लाख ७६ हजार १ सय ५१ हेक्टरमध्ये १ लाख ७५ हजार ६ सय ५२ हेक्टरमा धान रोपाइँ भइसकेको छ, जुन करिब शतप्रतिशत हो ।
