जगदीश रोकाया, बझाङ- सदरमुकाम चैनपुरमा यही साउन १९ गतेदेखि सुरु हुने ऐतिहासिक तथा धार्मिक सुर्मादेवी बिरीजात मेलाबारे आयोजकले पत्रकार सम्मेलन गरेको छ ।
आयोजक सुर्मा सरोवर युवा समाजले पत्रकारहरूलाई मेलाको सम्पूर्ण तयारी तथा मेला अवधिभर आयोजना गरिने गतिविधिहरूको बारे जानकारी दिन पत्रकार सम्मेलन गरेको हो । सो अवसरमा मेलामा प्रदान गरिने भलिबल प्रतियोगिता ट्रफीको अनावरण समेत गरिएको छ ।
मेला साउन १९ गतेदेखि २२ गतेसम्म सुर्मा गाउँपालिका–३, ठकुन्नामा आयोजना हुनेछ। मेलाको औपचारिक उद्घाटन साउन २० गते गरिने आयोजक समितिका अध्यक्ष शान्त बोहराले जानकारी दिए ।
मेलाको अवसरमा महिला–पुरुष भलिबल प्रतियोगिता, ढाँकी नाच प्रतियोगिता तथा डेउडा खेल जस्ता विविध सांस्कृतिक तथा खेलकुद कार्यक्रम आयोजना गरिने बताइएको छ।
कार्यक्रममा बोल्दै आयोजकहरूले सुर्मा सरोवरसम्मको खालि खुट्टा यात्रा, बिचबाटोमा पारंपरिक ‘पर्छौँ’ गर्ने चलन, स्थानीय भेषभूषा, मागल फाग, चाँभाइ खेल लगायतका पक्षहरूलाई मेलाको मुख्य आकर्षणको रूपमा प्रस्तुत गरेका छन्।
पत्रकार सम्मेलनमा पत्रकार महासंघ बझाङका अध्यक्ष ललित सिंहले कार्यक्रम सञ्चालन गरेका थिए । उनलेे मेलाको प्रचारप्रसारमा सञ्चारकर्मीहरूको भूमिका महत्वपूर्ण हुने भन्दै सबैको सहयोगको अपेक्षा व्यक्त गर्नुभयो।
मेलालाई सभ्य, भव्य र व्यवस्थित ढंगले सम्पन्न गर्न सुर्मा गाउँपालिकाका सरोकारवालाहरूको सक्रिय सहभागिता रहेको आयोजकहरूले बताएका छन्।
