धनगढी- सुदूरपश्चिम प्रदेशका मुख्यमन्त्री कमलबहादुर शाहले आज बिहीबार विश्वासको मत लिँदै छन्। अपराह्न ५ बजे बस्ने प्रदेश सभाको बैठकमा उनले विश्वासको मत लिने कार्यसूची रहेको छ।
नागरिक उन्मुक्ति पार्टीले मन्त्री रामेश्वर चौधरीलाई बर्खास्त गरेको भन्दै असार २० गते सरकारबाट समर्थन फिर्ता लिएपछि शाहलाई संवैधानिक प्रावधान अनुसार ३० दिनभित्र विश्वासको मत लिनुपर्ने बाध्यता आएको हो।
मुख्यमन्त्री शाहलाई विश्वासको मत दिन सत्ता साझेदार नेकपा एमालेले ह्वीप जारी गरेको छ। एमालेका प्रमुख सचेतक सुरेन्द्र पालका अनुसार सबै सांसदलाई अनिवार्य रूपमा उपस्थित भई पक्षमा मतदान गर्न निर्देशन दिइएको छ।
त्यस्तै, नेपाली कांग्रेसले पनि आफ्ना सांसदलाई धनगढी नछोड्न र बैठकमा उपस्थित भई समर्थनमा मतदान गर्न निर्देशन दिएको प्रमुख सचेतक विक्रमसिंह धामीले जानकारी दिए।
तर, माओवादी केन्द्रका ११ र नागरिक उन्मुक्ति पार्टीका ७ सांसदले विपक्षमा मतदान गर्ने जनाएका छन्। प्रदेश सभामा एकीकृत समाजवादीका ४, राप्रपा र एक स्वतन्त्र गरी २ सांसद पनि रहेका छन्।
कुल ५३ सदस्य रहेको सुदूरपश्चिम प्रदेशसभामा विश्वासको मतका लागि कम्तीमा २७ मत आवश्यक पर्छ। कांग्रेसका १८ र एमालेका ११ सांसद मिलाएर २९ मत पुग्ने भएकाले विश्वासको मत प्राप्त गर्नेमा शंका छैन। तर, शाह नेतृत्वको सरकारले दुई तिहाइ बहुमत भने गुमाउने निश्चित देखिन्छ।
