दार्चुला- दार्चुलाको व्यास गाउँपालिका–१ मा पर्ने नेपाल–चीन सीमानाका (टिङ्करभन्ज्याङ १ नम्बर पिल्लर) साउन ७ देखि ९ गतेसम्म खुल्ने भएको छ। चीनको तिब्बतस्थित ताक्लाकोट प्रशासनले छाङरु र टिङ्करका स्थानीय व्यापारीलाई नाका खुल्नेबारे जानकारी गराएको हो।
नाका खुल्ने सूचना पाएपछि यहाँका व्यापारी चीनको ताक्लाकोटतर्फ व्यापारका लागि तयारीमा जुटेका छन्। व्यापारी योगेश बोहराका अनुसार नेपाली व्यापारीले ताक्लाकोटमा नेपाली तथा भारतीय सामानको व्यापार गर्दै आएका छन्। उनका अनुसार हाल ७०–८० जना व्यापारी यसमा संलग्न छन्।
नेपाल–चीनमैत्री संघका केन्द्रीय सदस्यसमेत रहेका बोहराले जिल्ला प्रशासनलाई जानकारी दिएको बताए पनि प्रमुख जिल्ला अधिकारी अनिल पौडेलले भने तिब्बत प्रशासनको आधिकारिक पत्र प्राप्त नभएको जनाएका छन्।
जिल्ला प्रशासन कार्यालयका अनुसार यस वर्ष व्यास गाउँपालिकाका १४६ जनाले तिब्बत प्रवेश अनुमति नवीकरण गराएका छन् भने ६८ जनाले नयाँ अनुमति लिएका छन्। अन्य पालिकाबाट ४८ जनाले अनुमति लिएका छन्।
नेपालतर्फ छियालेकमा सशस्त्र प्रहरीको बिओपी र नेपाल प्रहरीको चौकी छन्। छियालेकबाट करिब ६–७ किलोमिटर टाढा रहेको १ नम्बर सीमास्तम्भ पुग्न झन्डै पाँच घण्टा लाग्छ। चीनले टिङ्कर नजिकै सापु भन्ने ठाउँमा चेकपोस्ट र सुरक्षाकर्मीको संरचना निर्माण गरेको छ।
कोभिड–१९ महामारीका कारण लामो समय बन्द भएको यो नाका गत वर्षदेखि पुनः सञ्चालनमा आएको हो। छाङरु र टिङ्करका व्यापारी परम्परागत रूपमा यही नाका भएर आवतजावत गर्दै आइरहेका छन्।
