धनगढी- जिल्ला भन्सार कार्यालय कैलालीले आर्थिक वर्ष २०८१/८२ मा कुल ८ अर्ब ६६ करोड ९८ लाख रुपैयाँ राजस्व संकलन गरेको छ। कार्यालयले सो अवधिका लागि ११ अर्ब १६ करोड २६ लाख रुपैयाँ राजस्व संकलनको लक्ष्य लिएको थियो। तर, लक्ष्यको मात्र ७७.६७ प्रतिशत राजस्व संकलन गर्न सफल भएको कार्यालयले जनाएको छ।
भन्सार कार्यालयका सूचना अधिकारी खिमप्रसाद अर्यालका अनुसार संकलित राजस्वमध्ये भन्सार महसुलबाट ३ अर्ब २३ करोड ९९ लाख, मूल्य अभिवृद्धि कर (भ्याट) बाट ३ अर्ब २३ करोड १५ लाख, अन्तःशुल्कबाट २१ करोड ४४ लाख र अन्य शीर्षकहरूबाट १ अर्ब ९८ करोड ३९ लाख रुपैयाँ संकलन भएको छ।
महिनावारी विवरणअनुसार साउनदेखि असारसम्म राजस्व संकलन यस्तो रहेको छ:
साउन: ५७ करोड ५० लाख
भदौ: ५३ करोड ८४ लाख
असोज: ६७ करोड २४ लाख
कात्तिक: ६२ करोड ७८ लाख
मंसिर: ८१ करोड १३ लाख
पुस: ६५ करोड ८७ लाख
माघ: ७३ करोड २ लाख
फागुन: ७२ करोड ७६ लाख
चैत: ७८ करोड १४ लाख
वैशाख: ८१ करोड ८० लाख
जेठ: ८७ करोड १३ लाख
असार: ८५ करोड ६९ लाख रुपैयाँ।
कार्यालयले अघिल्लो आर्थिक वर्ष २०८०/८१ मा पनि लक्ष्यअनुसारको राजस्व संकलन गर्न सकेको थिएन। उक्त वर्ष ११ अर्ब ५८ करोड २४ लाख रुपैयाँको लक्ष्य लिइएकोमा केवल ७ अर्ब ९१ करोड ८० लाख रुपैयाँ संकलन भएको थियो, जुन कुल लक्ष्यको ६८.३६ प्रतिशत मात्र हो।
निरन्तर लक्ष्यभन्दा कम राजस्व संकलन भइरहेका बेला भन्सार कार्यालयलाई स्रोत व्यवस्थापन, व्यापार प्रवाह र चुहावट नियन्त्रणतर्फ थप चुनौती र सुधारको खाँचो देखिएको छ।
