काठमाडौं- पूर्वराष्ट्रपति विद्यादेवी भण्डारीले आफू नेकपा (एमाले) को अध्यक्ष बन्नकै लागि सक्रिय राजनीतिमा फर्किएको स्पष्ट पारेकी छन्।
इमेज टेलिभिजनलाई दिएको अन्तर्वार्तामा भण्डारीले अहिले औपचारिक घोषणा गर्ने समय नआएको बताउँदै पार्टी नेतृत्वका लागि नै पुनरागमन गरेको संकेत दिइन्। “तपाईंले भनेको कुरामा सत्यता छ,” पत्रकार जगदीश खरेलको प्रश्नमा उनले भनिन्, “११ औं महाधिवेशन तोकिएको छैन। तर यो विषय सार्वजनिक बहसमा आइसकेको छ। मेरो धारणा पनि त्यही लाइनमा पर्छ। समय आउनुपर्यो नि।”
उनले एमाले अध्यक्ष केपी शर्मा ओलीलाई आफ्नो उद्देश्य बारे जानकारी गराइसकेको बताइन्। पार्टी सदस्यता पनि लिइसकेको जानकारी दिँदै भण्डारीले आफू सबै विकल्पका लागि खुला रहेको बताइन्।
प्रधानमन्त्री बन्ने सम्भावनाबारे सोधिएको प्रश्नमा भण्डारीले भनिन्, “मैले आफूलाई कुनै सीमामा बाँधेकी छैन। परिस्थिति अनुसार निर्णय हुन्छ।”
ओली पुनः अध्यक्ष नहुने विश्वास व्यक्त गर्दै उनले भनिन्, “उहाँ दुई कार्यकाल अध्यक्ष भइसक्नुभयो। मैले चिनेको केपी ओली फेरि म नै हुन्छु भन्ने मान्छे होइन। एउटै कक्षाको परीक्षा दोहोर्याएर नदिने स्वभावको हुनुहुन्छ। त्यसैले अध्यक्षमा दोहोरिनुहुन्न भन्ने मेरो विश्वास छ।”
