काठमाडौँ– नेपालले सिङ्गापुरलाई पराजित गर्दै एसीसी १६ वर्षमुनिको इस्ट जोन कप क्रिकेटको उपाधि जितेको छ। प्रतियोगिताभर अपराजित रहेको नेपालले फाइनलमा सिङ्गापुरले दिएको ११४ रनको लक्ष्य २९ ओभरमा ८ विकेट गुमाउँदै भेट्टायो।
नेपालका जोए थापा २४ रनमा अविजित रहे। ५८ रनमा ५ विकेट गुमाएको अवस्थामा उनले शुभम् खनालसँग छैटौं विकेटका लागि ३३ रन र अभय यादवसँग नवौं विकेटका लागि अविजित २५ रनको साझेदारी गरे।
त्यसअघि, मलेशियाको बाङ्गीमा टस जितेर ब्याटिङ गरेको सिङ्गापुर ४०.५ ओभरमा ११३ रनमा अलआउट भयो। सिङ्गापुरका रोहन अस्टिन अरुणले सर्वाधिक २३ रन बनाए। नेपालका सुशीलबहादुर रावल र अभय यादवले समान ३ विकेट लिए भने शुभम् खनालले २ र कप्तान विपिनप्रसाद शर्माले १ विकेट लिए।
सेमिफाइनलमा नेपालले मलेशियालाई र सिङ्गापुरले हङकङलाई हराउँदै फाइनलमा स्थान बनाएका थिए। आयोजक मलेशियाले हङकङलाई ५ विकेटले पराजित गर्दै तेस्रो स्थान हासिल गर्यो। नेपाल यस प्रतियोगिताको साविक विजेता पनि हो।
