कञ्चनपुर— कञ्चनपुरमा डुबानका कारण १० परिवार विस्थापित भएका छन्। पुनर्वास नगरपालिकाबाट ७, कृष्णपुर नगरपालिकाबाट २ र भीमदत्त नगरपालिकाबाट १ परिवारलाई सुरक्षित स्थानमा सारिएको जिल्ला प्रहरी कार्यालयका प्रवक्ता तथा प्रहरी नायब उपरीक्षक सागर बोहराले जानकारी दिएका छन्।
उनका अनुसार, विस्थापित सबैलाई नजिकैको विद्यालय तथा आफन्तका घरमा बस्ने व्यवस्था गरिएको छ। “घर डुबानमा परेपछि मानिससहित गाईभैंसी र बाख्रालाई सुरक्षित स्थानमा लगिएको छ,” उनले भने।
पुनर्वास नगरपालिका–५ को पशुपतिचोक क्षेत्रका ७ परिवारलाई उद्धार गरी छिमेकीका घरमा राखिएको छ। त्यस्तै, कृष्णपुर नगरपालिका–७ स्थित कार्की कटान क्षेत्रका २ परिवारलाई सुरक्षित घरमा सारिएको छ।
भीमदत्त नगरपालिका–१९ त्रिवेणी टोलकी कलावती जोशीको ५ सदस्यीय परिवारसहित २ गाई, १ भैँसी र ५ बाख्रालाई उद्धार गरी सिद्धनाथ आधारभूत विद्यालयमा अस्थायी बसोबासको व्यवस्था गरिएको छ।
त्यसैगरी, भीमदत्त नगरपालिका–१५ स्थित डम्बर राना क्षेत्रीको ज्योति कृषि तथा पशुपन्छी फार्म डुबानमा परेर करिब ७२ हजार रुपैयाँ बराबरको क्षति भएको प्रहरीले जनाएको छ।
