बझाङ ।
प्रारम्भिक तहका शिक्षकहरूलाई लक्षित गरी एकीकृत पाठ्यक्रमसम्बन्धी चार दिने क्षमता विकास तालिम सम्पन्न भएको छ । जेठ २३ गतेदेखि सुरु भएको तालिम वल्ड भिजन इन्टरनेशनल नेपाल र प्रगतिशील युवा समाजको आयोजनामा तथा जयपृथ्वी नगरपालिकाको समन्वयमा संचालन गरिएको हो ।
तालिममा जयपृथ्वी नगरपालिकाका २० र केदारस्युँ गाउँपालिकाका २० वटा विद्यालयका गरी ४० जना शिक्षकहरूको सक्रिय सहभागिता रहेको थियो । सदरमुकाम चैनपुरमा सम्पन्न तालिमले शिक्षकहरूको शैक्षिक दक्षता र व्यवहारिक क्षमता अभिवृद्धिमा सहयोग पु¥याउने आयोजकले बताएको छ ।
कार्यक्रममा बोल्दै जयपृथ्वी नगरपालिकाका शिक्षा संयोजक निरज प्रसाद रेग्मीले एकीकृत पाठ्यक्रम बालमैत्री सिकाइका दृष्टिले महत्वपूर्ण भएको बताउँदै शिक्षकहरूमा पाठ्यक्रम प्रतिको स्पष्ट बुझाइ र प्रयोगात्मक सीप विकास गर्ने उद्देश्यले तालिम आयोजना गरिएको बताए ।
तालिममा सहभागी शिक्षक मनोज चौहानले शिक्षकहरूका लागि यस्ता तालिमहरू अत्यन्त फलदायी हुने धारणा र बालबालिकाको रुचि, स्तर र आवश्यकतालाई मध्यनजर गरेर पढाउने कला यस तालिमबाट सिकाई भएको बताए ।
प्रगतिशील युवा समाजका कार्यकारी निर्देशक लवराज जोशीले विद्यालयमा गुणस्तरीय शिक्षा प्रवाह गर्न शिक्षकमै आधारित तालिमको खाँचो रहेको बताए । ‘यस्ता कार्यक्रमहरूले शिक्षकहरूलाई अझ सशक्त बनाउँछ ।’ उनले भने, शिक्षकहरूमा व्यवहारिक शिक्षण शैली, अभिलेखीकरण र मूल्याङ्कन विधिमा सुधार ल्याउने लक्ष्य राखेका थियौं, सोहि अनुरुप तालिम संचालन गरेका हौ ।’
कार्यक्रमका अध्यक्ष तथा प्रगतिशील युवा समाजका अध्यक्ष रमेश केसीले शिक्षकहरुले प्रविधिमा आधारित भएर सिकाई गर्नुपर्ने र भविष्यमा समेत शिक्षकहरूको क्षमता अभिवृद्धिका कार्यक्रमलाई निरन्तरता दिने प्रतिबद्धता व्यक्त गरेका छन् ।
