धनगढी । कैलालीको गौरीगंगा नगरपालिका–४ राजीपुरका सहदेव कुमाल २५ बैशाखमा धनगढीबाट बेपत्ता भएपछि तय भइसकेको विवाह एकाएक रद्द भयो । कुमाल बेपत्ता भएपछि उनीसँगको ३ वर्षदेखिको प्रेम सम्बन्धमा रहेर विवाह गर्न राजी भएकी बाजुराकी बुढा थरकी युवती खोजीका लागि भन्दै इलाका प्रहरी कार्यालय मालाखेतीमा पुगेकी थिइन् ।
कुमालकी भाउजुले समेत देवरको खोजीका लागि भन्दै जिल्ला प्रहरी कार्यालयमा निवेदन दिएकी थिइन् तर कुमालको अत्तोपत्तो नलागेपछि अन्ततः दुवै परिवारको समेत सहमतीमा तय भइसकेको विवाह रद्द भएको थियो ।
कुमाल सम्पर्कमा नआएपछि प्रेम सम्बन्धमा रहेकी युवती अब उनको वास्ता नगर्ने निर्णयमा पुग्छिन् । तर प्रेममा भएका बेला विभिन्न समयमा युवकलाई पठाएको झन्डै दुुई लाख पैँसाको चिन्ताले उनलाई पिरोल्न थाल्यो ।
घरपरिवारलाई विभिन्न समयमा युवकलाई एक लाख ८३ हजार रुपैयाँ बैँकमार्फत पठाएको देखाएपछि उनका बुवा उक्त रकम फिर्ता गर्नुपर्ने माग गर्दै इलाका प्रहरी कार्यालय मालाखेतीमा पुगेका थिए । तर त्यहाँ केटा पक्षले उनी सम्पर्कमा नभएका कारण रकम दिन नसकिने अडान लिएपछि तनाव सिर्जना भयो ।
प्रहरीले पैँसाको मामला आफैँ मिलाउन आग्रह गर्दै उनीहरुलाई सम्झाइ बुुझाइ गरेको थियो । केटा पक्ष केटी पक्षलाई उक्त रकम फिर्ता गर्न तयार भएर उनीहरु छुट्टिएका थिए । रोचक कुरा के भने, प्रहरी कार्यालयमा रकम फिर्ता लिने÷दिने सहमति गरेको भोलिपल्टै युवती बेपत्ता भनिएका युवकसँगै विवाह गर्न भन्दै भागेर गएको खुलेको छ ।
५ जेठमा उनीहरुबीच रकम फिर्ता दिने सहमती भएको थियो । त्यसको भोलिपल्ट भने युवती उनै युवकसँग भागेको कुरा स्वयंम उनका बुवाले इलाका प्रहरी कार्यालय मालाखेतीलाई जानकारी दिएका थिए । युवक पक्षले समेत युवती युवकसँगै पुगिसकेको बताएको प्रहरीले जनाएको छ । यो सँगै उनीहरुको टुट्नै लागेको प्रेम फेरि जोडिएको छ ।

