कैलाली: बित्थडचिर गाउँपालिका वडा नम्बर ६ का स्थानीय बासिन्दाले अब धनगढीस्थित नोभा अस्पतालमा २५ प्रतिशत छुटसहित स्वास्थ्य सेवा प्राप्त गर्न सक्ने भएका छन्। अनेरास्ववियु सुदूरपश्चिम प्रदेश कमिटी सदस्य मुकेश स्याँडाको विशेष पहलमा उक्त सुविधा उपलब्ध भएको हो।
स्वास्थ्य जस्तो आधारभूत आवश्यकता सबैका लागि सुलभ बनाउँदै आर्थिक रूपमा कमजोर नागरिकलाई लक्षित गर्दै विद्यार्थी नेता स्याँडाले नोभा अस्पतालसँग औपचारिक सम्झौता गरेका हुन्। अस्पताल प्रशासनसँगको समन्वयमा गरिएको यो सम्झौतामा अस्पतालका प्रमुख प्रशासनिक अधिकृत गिता खत्री र विद्यार्थी नेता स्याँडाले २०८२ वैशाख २४ गते हस्ताक्षर गरेका छन्।
सम्झौतापछि बित्थडचिर गाउँपालिका वडा नम्बर ६ का बासिन्दाले सामान्य उपचारदेखि विशेष स्वास्थ्य परीक्षणसम्म २५ प्रतिशत छुटसहितका सेवा प्राप्त गर्न सक्नेछन्। यो सेवा लिनका लागि नागरिकले आफ्नो नागरिकता प्रमाणपत्र वा वडा कार्यालयबाट प्रमाणित परिचयपत्र अनिवार्य रूपमा पेश गर्नुपर्नेछ।
छुटसम्बन्धी जानकारी दिँदै विद्यार्थी नेता स्याँडाले भने, “गाउँका दाजुभाइ तथा दिदीबहिनीहरूले सहज र गुणस्तरीय स्वास्थ्य सेवा पाउन सकून् भन्ने उद्देश्यले यो पहल गरिएको हो। भविष्यमा पनि जनताको हितमा यस्ता कार्यक्रमहरू निरन्तर अगाडि बढाउने प्रतिबद्धता लिएको छु।”
