कञ्चनपुर— कञ्चनपुरको वेदकोट नगरपालिका–९ का वडाध्यक्ष जनकबहादुर बिष्टको निधन भएको छ। बुधबार दिउँसो वेदकोट ताल नजिकै उनी बेहोस अवस्थामा फेला परेका थिए।
पारिवारिक स्रोतका अनुसार, उपचारका क्रममा महाकाली प्रादेशिक अस्पतालमा उनको साँझ मृत्यु भएको हो। बिष्ट नेकपा एमालेबाट निर्वाचित वडाध्यक्ष थिए।
निधनअघि उनले सामाजिक सञ्जाल फेसबुकमा स्टाटस लेख्दै “हासो भित्रको पीडा” उल्लेख गरेका थिए। उनले एक जना आफन्तलाई फोन गरेर आफू संसारबाट बिदा हुन लागेको र छोराछोरीको ख्याल गरिदिन आग्रह गरेका थिए।
आत्महत्या आशंका गरिएको छ, र उनले विषादी सेवन गरेको हुन सक्ने अनुमान गरिएको छ। यद्यपि, शव परीक्षणपछि मात्र यथार्थ खुल्ने चिकित्सकको भनाइ छ।
