बाजुरा— बाजुरामा चालु आर्थिक वर्षको ९ महिनामा बाजुरामा विभिन्न विपद्बाट १३ जनाले ज्यान गुमाएका छन्। यिनै घटनाबाट करिब एक करोड ८४ लाख ८१ हजार रुपैयाँ बराबरको क्षति भएको छ।
भूकम्प, पहिरो, बाढी, आगलागी, चट्याङ, हावाहुरीलगायतका प्राकृतिक विपद्बाट ठूलो मात्रामा धनजनको क्षति भएको तथ्यांकले देखाएको छ।
सुरक्षा निकायका अनुसार सबैभन्दा धेरै घटना बाढी, पहिरो र आगलागीका कारण भएका छन्। जिल्ला प्रहरी कार्यालय बाजुराका अनुसार आगलागीबाट एक जनाको ज्यान गएको छ भने चट्याङ लागेर २ जनाको मृत्यु र ५ जना घाइते भएका छन्। पहिरोमा परेर ४ जना घाइते भएका छन्।
सबैभन्दा धेरै घटना भीरबाट लडेका छन्— जसमा ६ जनाले ज्यान गुमाएका छन् र ८ जना घाइते भएका छन्। त्यस्तै, रुखबाट लडेका कारण १ जनाको मृत्यु र ४ जना घाइते भएका छन्। जंगली जनावरको आक्रमणमा १ जनाको मृत्यु र ५ जना घाइते भएका छन्।
अन्य विभिन्न कारणले २ जनाको मृत्यु, ३ जना घाइते भएका छन् भने करेन्ट लागेर १ जनाको मृत्यु र ३ जना घाइते भएका छन्। सर्पको टोकाइबाट ८ जना घाइते भएका छन्।
यस अवधिमा जम्मा १२५ वटा विपद्का घटना भएका छन्। ती घटनामा १०९ वटा पशु चौपायाको मृत्यु, १६ वटा घाइते र ४८ वटा वेपत्ता भएको प्रहरीले जनाएको छ।
प्राकृतिक विपद्का कारण ६४ वटा घर पूर्णरूपमा ध्वस्त, ३८५ घर आंशिक क्षति र ५८ वटा घर सामान्य क्षतिमा परेको जनाइएको छ।
