काठमाडौं— भारतमा जारी इन्डियन प्रिमियर लिग (आईपीएल) क्रिकेट अन्तर्गत मंगलबार भएको खेलमा गुजरात टाइटन्सले राजस्थान रोयल्सलाई ५८ रनले पराजित गरेको छ।
नरेन्द्र मोदी स्टेडियममा पहिले ब्याटिङ गर्दै गुजरातले निर्धारित २० ओभरमा ६ विकेट गुमाउँदै २१७ रनको विशाल योगफल खडा गरेको थियो। जवाफी ब्याटिङमा ओर्लिएको राजस्थान १९.२ ओभरमै १५९ रनमा अलआउट भयो।
गुजरातका साई सुदर्शनले सर्वाधिक ८२ रन बनाए भने जस बटलर र शाहरुख खानले समान ३६–३६ रन जोडे। राजस्थानका तुषार देशपाण्डे र महिश थेक्सनाले समान २/२ विकेट लिए। जोफ्रा आर्चर र सन्दीप शर्माले १/१ विकेट हात पारे।
राजस्थानका लागि सिम्रन हेटमेरले सर्वाधिक ५२ रन बनाए। कप्तान सञ्जु सामसनले ४१ तथा रियान परागले २६ रनको योगदान दिए।
गुजरातका प्रसिद्ध कृष्णाले ३ विकेट लिए भने रसिद खान र साई किशोरले समान २/२ विकेट झारे।
यो जितसँगै गुजरातले ५ खेलमा ८ अंक जोड्दै दिल्ली क्यापिटल्सलाई पछि पार्दै अंक तालिकाको शीर्ष स्थानमा उक्लिएको छ। दिल्ली दोस्रो स्थानमा छ भने राजस्थान ५ खेलमा ४ अंकसहित सातौं स्थानमा झरेको छ।
आईपीएल अन्तर्गत आज रोयल च्यालेन्जर्स बैंगलोर (आरसीबी) र दिल्ली क्यापिटल्सबीच प्रतिस्पर्धा हुनेछ।
