धनगढी- कैलालीको धनगढीस्थित ऐश्वर्य बहुमुखी क्याम्पसको स्वतन्त्र विद्यार्थी युनियन (स्ववियु ) सभापतिमा नेपाल विद्यार्थी संघ (नेविसंघ) दीपकराज भट्ट निर्वाचित भएका छन् ।
मंगलबार भएको स्ववियु चुनावमा ५ सय ३३ मत ल्याएर सभापतिमा भट्ट निर्वाचित भएका हुन् ।
उनका निकटतम प्रतिद्वन्द्वी अनेरास्ववियुका दिपेन्द्र भट्टले ४ सय २५ मत र अखिल क्रान्तिकारीका विकास बिष्टले ४ सय २ मत प्राप्त गरे ।
यस्तै, सचिवमा देवेन्द्र बोहरा ५ सय ५४ मत र कोषाध्यक्षमा सन्चिताकुमारी चौधरी ५ सय ६९ मत प्राप्त गरी निर्वाचित भएका छन् । यी दुबै नेविसंघ नेतृत्वको प्यानलका उम्मेदवार थिए। दुई हजार एक सय विद्यार्थी रहेको उक्त क्याम्पसमा मंगलबार भएको मतदानमा एक हजार ४०३ मत खसेको थियो।
यसअघि ऐश्वर्य बहुमुखी क्याम्पसमा तीन पटक स्ववियु निर्वाचन भएको थियो। १५ वर्षअघि भएको निर्वाचनमा नेविसंघका राजेन्द्र भट्ट सभापति निर्वाचित भएका थिए। दोस्रो निर्वाचनमा राप्रपा निकट विद्यार्थी संघका कमल बम विजयी भए, जबकि नेविसंघले अन्य पदमा विजय हासिल गरेको थियो। तेस्रो निर्वाचनमा अनेरास्ववियु विजयी भएको थियो।
