सत्यराज सिंह- बझाङ ।
बझाङको जयपृथ्वी नगरपालिका र केदारस्युँ गाउँपालिकाका ४ सय बालबालिकालाई आधारभुत आत्मरक्षा तालिम दिइने भएको छ । जिल्लामा सञ्चालित प्रगतिशिल युवा समाज, वल्डभिजन इन्टरनेश्नल नेपालको आर्थिक सहयोगमा र पालिकाको समन्वयमा १८ बर्ष मुनी तथा १२ बर्ष माथिका बालबालिकालाई आधारभुत आत्मरक्षा सिप तथा आधारभुत प्रशिक्षण तालिम दिइने भएको हो । प्रगतिशिल युवा समाज र वल्र्ड भिजनको साँझेदारीमा संचालित बाल संरक्षण परियोजना अन्र्तगत उक्त कार्यक्रम गरिएको संस्थाले जनाएको छ ।
सोमबार जयपृथ्वी नगरपालिका–६ मा रहेको भवानी माध्यामिक विद्यालय नौरामा कार्यक्रमको सुरुवात गर्दै संस्थाले बालबालिकामाथि हुने यौनजन्य हिंसाका घटनामा कमी आउन नसकेकाले त्यसमा कमि ल्याउन आधारभुत तालिमको आयोजना गरिएको बाल संरक्षण परियोजनाका अधिकृत विनोद थापाले बताए । उनले भने, ‘दिनदिनै जसो यस्ता घटना भइरहेको पाइन्छ ।
बलात्कार, हत्या, हिंसा, यौनजन्य अपराध जस्ता घटनाबाट जोगिन बालबालिलाई आत्मरक्षा तालिमको आयोजना गरिएको हो ।’ संस्थाले प्रत्येक ठाउँमा प्रशिक्षक खटाएको छ ।
आधारभुत सिपमा बालबालिकाहरुलाई आत्मरक्षाका विभिन्न उपाय सिकाएको छ । यौनजन्य हिंसाको प्रयास गर्नेको आँखामा दबाब दिने, अनुहार चिथोर्ने, शरीरमा टोक्ने वा संवेदनशील अंगमा प्रहार गर्नेलगायतका उपायबारे बालबालिकालाई प्रशिक्षण दिइएको हो । बालबालिकाहरुलाई शारीरिक र मानसिक रुपमा सक्षम बनाउनेदेखि यौनजन्य हिंसा र दुव्यर्वहारबाट सुरक्षित रहन अपनाउन सकिने उपायबारे ज्ञान दिइएको छ ।
कार्यक्रममा बोल्दै जयपृथ्वी नगरपालिका–६ का वडाअध्यक्ष नरेन्द्र बहादुर सिंहले वडा सरकारले बालमैन्त्री स्थानिय शासन वडा घोषणा गर्ने तयारी गरेकाले सोहिको तयारीको अनुरुप यो कार्यक्रम गरिएको बताए । बालबालिका सम्वन्धी हुने घटनाहरुलाई रोक्नका लागि यो आधारभुत तालिमले सहज बनाउने समेत वडाअध्यक्ष सिंहले बताए ।
आत्मरक्षा तालिम सेल्फकन्फिडेन्सका लागि भएकाले यसलाई घर र समुदायमा पनि निरन्तरता दिन प्रगतिशल युवासमाजका अध्यक्ष रमेश केसीले बालबालिकाहरुलाई आग्रह गरेका छन् ।
आत्मरक्षा तालिम पाएपछि बालबालिका खुसी भएका छन् । बाटोमा एक्लै हिड्दा कसैबाट पीडित हुन्छु कि भन्ने डर पनि तालिमले हटाइ दिएको छ । प्रत्येक विद्यालय र समुदायमा तालिम प्राप्त बालबालिकाले अन्य बालबालिकालाई पनि सिकाउने भएकाले समाजमा बढ्दो बालदुव्र्यवहारलाई कमी गर्न र जोगिन सक्ने अपेक्षा संस्थाको छ ।
