धनगढी- चितवनमा सुदूरपश्चिमेली समुदायले मनाएको होली पर्व सम्पन्न भएको छ। मौलिक संस्कृति झल्काउने परम्परागत शैलीमा मनाइएको रङ्गहरूको पर्व होली नारायणी नदी किनारमा सम्पन्न भएको हो ।
होली कार्यक्रममा सयौंको संख्यामा जनाइएको उपस्थितले सुदूरपश्चिमेलीहरूमा आपसी सद्भाव र एकताको सन्देश दिएको छ । होली लगायतका परम्परागत रुपमा मनाइने यस्ता कार्यक्रमहरूले सुदूरपश्चिमेली पहिचानलाई उजागर गर्नुका साथै संस्कृतिको जगेर्ना गर्न सहयोग गर्ने सुदूरपश्चिम खप्तड सेवा समाज चितवनका अध्यक्ष जीवन रावलले बताए । उनले चितवनमा रहेका सुदूरपश्चिमेलीहरूलाई अझ संगठित बनाउन यस्ता गतिविधिहरू आवश्यक रहेको समेत बताए।
होली पर्वमा सहभागीहरूले रंग, संगीत र नृत्यको साथमा उल्लासमय वातावरणमा होली खेलेका थिए । समाजले आगामी दिनहरूमा पनि मौलिक कार्यक्रममा निरन्तरता दिने योजना बनाएको छ।
पहाडी तथा हिमाली जिल्लामा पूर्णिमाका दिन होली मनाइएको भोलिपल्ट तराईमा होली पर्व मनाउने प्रचलन गरेको छ ।
सत्य युगमा विष्णुभक्त प्रह्लादलाई मार्नका लागि हिरण्यकश्यपुले विभिन्न जाल बुन्दा पनि नसकेपछि आगोबाट नजल्ने र नमर्ने वरदान पाएकी बहिनी होलिकालाई प्रह्लादलाई काखमा लिएर आगोमा बस्न लगाउँदा प्रह्लादलाई केही नभएको तर होलीका आफैँ जलेर नष्ट भएपछि असत्यमाथि सत्यको विजय भएको प्रतीकको रुपमा होली पर्व मनाउने गरिएको मान्यता छ।
