धनगढी- बझाङका एक ९ वर्षीय बालकले कराते खेलमा विश्व कीर्तिमान राख्न सफल भएका छन्। जिल्लाको मष्टा गाउँपालिका- १, कोटदेवल घरभएका ९ वर्षीय अन्सु खड्काले कराते खेलमा विश्व कीर्तिमान राख्न सफल भएका हुन् ।
भारतको कर्नाटक राज्य, बैंगलोरमा बस्दै आएका अन्सुले फेब्रुअरी २५ मा तामिलनाडु फिजिकल एजुकेशन एण्ड स्मार्ट युनिभर्सिटी, चेन्नईमा आयोजित कराते प्रतियोगितामा २२ हजार सहभागीलाई पछि पार्दै गिनिज बुक अफ वर्ल्ड रेकर्डमा आफ्नो नाम लेखाएका छन् ।
अन्सुले कराते खेल्न थालेको जम्मा २ वर्ष ८ महिना मात्र भएको उनकी आमा ईश्वरीदेवी खड्काले बताइन्। छोराको सफलताले परिवार मात्र नभई बझाङकै नाम उचो बनाएकोमा गर्व लागेको उनले बताइन्।
बुवा विक्रम बहादुर खड्काले अन्सु बझाङ जिल्लाकै पहिलो गिनिज बुक रेकर्ड होल्डर भएको जानकारी दिनुभयो। अन्सुले यसअघि पनि विभिन्न ७ स्थानमा गोल्ड मेडल जितिसकेका छन्।
उनी एक्सप्रेस वर्ल्ड कराते मास्टर्स एसोसिएशन (WKMA) बाट सम्मानित समेत भएका छन्।
