धनगढी- सुदूरपश्चिम प्रदेशमा पाठेघरको मुखको क्यान्सरविरुद्धको एचपिभी (ह्युमन प्यापिलोमा भाइरस) खोप एक लाख बढी किशोरीलाई खोप लगाइएको छ।
गत माघ २२ गतेदेखि देशव्यापी सुरु गरिएको एचपिभी खोप अभियान अन्तर्गत प्रदेशका एक लाख ४३ हजार चार सय ८९ जना किशोरीलाई खोप लगाइएको हो ।
प्रदेशका नौ वटै जिल्लामा एक लाख ५१ हजार ५९ जना किशोरीलाई खोप दिने लक्ष्य राखेको सुदूरपश्चिम स्वास्थ्य निर्देशनालय, दीपायल, डोटीका सूचना अधिकारी धर्मानन्द गिरीले बताए । उनलेे भने यो कुल लक्ष्यको ९५ प्रतिशत प्राप्ति हो।
सूचना अधिकारी गिरीका अनुसार कैलालीका ४५ हजार ८ सय ८८, कञ्चनपुरका २५ हजार ८ सय ४०, डोटीका ११ हजार ३ सय ८८, अछामका १३ हजार ८ सय ९७ र डोटीका ११ हजार ३ सय ८८ जना किशोरीहरुलाई खोप लगाइएको छ ।
यसैगरी, डडेलधुराका ६ हजार ९ सय ४९, बझाङका ११ हजार ८ सय ९७, बाजुराका ७ हजार ६ सय ४९, बैतडीका १२ हजार ८ सय २८ र दार्चुलाका ७ हजार १ सय ५३ किशोरीहरुलाई पाठेघरको मुखको क्यान्सरविरुद्धको खोप लगाइएको छ।
गत माघ २२ गतेदेखि सुरु भएको देशव्यापी एचपिभी खोप अभियान फागुन ७ गतेसम्म जारी रहनेछ। यस अभियान अन्तर्गत कक्षा ६ देखि १० सम्म अध्ययनरत छात्राहरूलाई प्राथमिकता दिइएको छ। साथै, विद्यालय बाहिर रहेका १० देखि १४ वर्ष उमेर समूहका किशोरीहरूलाई पनि खोप लगाइएको छ।
यस अभियानबाट पाठेघरको मुखको क्यान्सरको जोखिम घट्ने विश्वास गरिएको छ।
