बझाङ : मष्टा गाउँपालिका, बझाङले सामुदायिक विद्यालयमा कार्यरत शिक्षक तथा कर्मचारीहरूको तलब भुक्तानी प्रक्रियालाई आधुनिक बनाउँदै विद्युतिय भुक्तानी प्रणाली (EFT) लागू गर्ने निर्णय गरेको छ। यो व्यवस्था गाउँपालिकाको आ.व. २०८१/८२ को नीति तथा कार्यक्रमअनुसार सञ्चालनमा ल्याइएको हो।
गाउँपालिकाका लेखापाल गगन गुर्धामीका अनुसार, “विद्युतिय भुक्तानी प्रणालीले शिक्षक तथा कर्मचारीहरूको समयको बचत गर्नुका साथै भुक्तानी प्रक्रियामा पारदर्शिता सुनिश्चित गर्नेछ। यो प्रणालीले आर्थिक कारोबारमा हुने सम्भावित त्रुटिहरूलाई न्यूनीकरण गर्न मद्दत गर्नेछ।”
यस विषयमा मष्टा गाउँपालिकाका नि.प्रमुख प्रशासकीय अधिकृत रमेश कुमार खड्काले भने, “यो निर्णयले न केवल शिक्षक-कर्मचारीहरूको सुविधामा सुधार ल्याउनेछ, बरु विद्यालय प्रशासन र आर्थिक व्यवस्थापनमा समेत सन्तुलन कायम गर्न सहयोग पुग्नेछ। हाम्रो उद्देश्य शिक्षाको गुणस्तर वृद्धि गर्नु र विद्यालयको कामकाजलाई सहज बनाउनु हो।”
गाउँपालिकाले शिक्षक तथा कर्मचारीहरूको मासिक तलब तथा भत्ता उनीहरूको व्यक्तिगत बैंक खातामा सिधै पठाउने व्यवस्था गरेको छ। यसबाट आर्थिक प्रणालीलाई थप व्यवस्थित र डिजिटल युगसँग जोड्न सहयोग पुग्ने अपेक्षा गरिएको छ।
शिक्षा क्षेत्रको सुधार र प्रभावकारी व्यवस्थापनको यो कदमले मष्टा गाउँपालिकाका शिक्षक-कर्मचारीबीच सकारात्मक प्रतिक्रिया ल्याउने विश्वास गरिएको छ।
