बझाङ : बझाङका छुट्टाछुट्टै तीन परीक्षा केन्द्रमा एसईई परीक्षार्थीबिच झडप भएको छ । शुक्रबार बिहान परीक्षा दिएर बाहिर निस्किएपछि जिल्लाका तीन वटा परीक्षा केन्द्रमा एसईई परीक्षार्थीबिच झडप भएको हो । झडपमा ४ जना घाइते भएका छन् ।
खप्तडछान्ना गाउँपालिका – ५ कालुखेतीस्थित खप्तड माविमा परीक्षा दिने पाटादेवलका १७ वर्षिय खप्पिस थापालाई स्थानिय बाल्केश सिंह, आनन्द सिंह लगाएत ३ – ४ जनाको समूहले चक्कु प्रहार गरेका हुन् । चक्कु प्रहारबाट थापाको पेट, टाउको र हातमा चोट लागेको छ । चक्कु प्रहार गर्नेहरुको खोजी भइरहेको प्रहरीले जनाएको छ ।
यसैबिच जिल्लाको दुर्गाथली गाउँपालिका – १ मौरीबगडस्थित चौधारी मावि जुँजी परीक्षा केन्द्रमा पनि परीक्षार्थीबिच झडप भएको छ । परीक्षा दिएर घर फर्किरहेका छविसपाथिभेरा गाउँपालिका – १ का १८ वर्षिय अभिषेक भण्डारी र खप्तडछान्ना गाउँपालिका – २ का १८ वर्षिय विमल बोगटीमाथि कुटपिट भएको हो । भण्डारी र बोगटीलाई कुटपिट गर्ने दुर्गाथली गाउँपालिका – १ का २७ वर्षिय प्रकाश खाती लगाएत युवाहरुलाई प्रहरीले नियन्त्रणमा लिएको जनाएको छ । घाइते दुवै जनाको जिल्ला अस्पतालमा उपचार भइरहेको र अवस्था मध्यम रहेको जिल्ला प्रहरी कार्यालय बझाङका प्रहरी निरीक्षक दिपेश चौधरीले बताए ।
यता मष्टा गाउँपालिका – ६ भातेखोलास्थीत कुलमष्टजन माविको परीक्षा केन्द्रमा पनि एक परीक्षार्थी माथि कुटपिट भएको छ । परीक्षा दिएर बाहिर निस्किने क्रममा १७ वर्षिय मुन्न बोहरालाई मष्टा गाउँपालिका – ५ का बादल र विमल बुढा लगाएत ५ – ६ जनाको समूहले कुटपिट गरेको प्रहरी निरीक्षक चौधरीले बताए । कुटपिटमा संलग्नको खोजी कार्य भइरहेको प्रहरीले जनाएको छ । कुटपिटको कारण भने खुलेको छैन । यस विषयमा अनुसन्धान भइरहेको प्रहरीले जनाएको छ ।
