धनगढी – डडेल्धुराको भागेश्वर गाउँपालिका-२, रुपालमा रहेको अशिग्राम माध्यमिक विद्यालयलाई गुणस्तरीय साउण्ड सिस्टम हस्तान्तरण गरिएको छ ।
अशिग्राम माविका पूर्व छात्र तथा समाजसेवी सिद्धराज पनेरूले विद्यालयबाट अख्तियारि लिई चन्दा संकलन गरेर आइतबार डिजिटल साउण्ड सिस्टम सेट र विद्युतिय घण्टी विद्यालयलाई हस्तान्तरण गरेका हुन् ।
उक्त साउण्ड सिस्टमका लागि समाजसेवी पनेरूले सामाजिक सञ्जालमार्फत विद्यालयका लागि चलाएको ‘साउण्ड सिस्टम र शैक्षिक सामग्री सहयोग संकलन अभियान’मा विभिन्न सहयोगी व्यक्तिहरुबाट एक लाख ५९ हजार छ सय ६७ रकम बराबरको उक्त सामग्री विद्यालयलाई हस्तान्तरण गरिएको विद्यालयका प्रधानाध्यापक राजेन्द्रबहादुर पाण्डेले बताए ।
उक्त रकमबाट साउण्ड सिस्टम लगायतका सामग्रीहरु खरिद गरी विद्यालयलाई हस्तान्तरण भइ सम्पूर्ण आयव्यय सार्वजनिक गरिएको प्रधानाध्यापक पाण्डेले जानकारी गराएका छन् । उक्त अभियानमा ७४ जना सहयोगीले सहयोग गरेका छन् ।
विद्यालय व्यवस्थापन समितिका अध्यक्ष गोपी भारतीको अध्यक्षतामा भएको हस्तान्तरण समारोहमा भागेश्वर गाउँपालिका वडा नम्बर २ का वडा अध्यक्ष उपेन्द्र जोराको प्रमुख आतिथ्यता रहेको थियो ।
विद्यालयका शिक्षक दौलत टमटाले सञ्चालन गरेको उक्त हस्तान्तरण समारोहमा पूर्व प्रधानाध्यापक तारी सिंह जोराले सम्पूर्ण सहयोगी दाताहरूको नाम वाचन गरेका थिए ।
विद्यालयका प्रधानाध्यापक राजेन्द्र बहादुर पाण्डे, प्रमुख अतिथि उपेन्द्र जोरा र विद्यालय व्यवस्थापन समितिका अध्यक्ष गोपी भारतीले समाजसेवी पनेरूलाई सहयोगलाई धन्यवाद व्यक्त गरेका छन् ।
कार्यक्रममा अभियानकर्ता पनेरूले उक्त अभियानलाई सहयोग पुर्याउने सम्पूर्णलाई सम्मान व्यक्त गर्दै धन्यवाद ज्ञापन गरेका छन् । त्यस्तै अगामी दिनमा पनि सम्पूर्णको साथ सहयोग रहने उनले बताए ।
विद्यालयका लागि सदैव सहयोग गरिरहने समाजसेवी सिद्धराज पनेरूले प्रतिबद्धता व्यक्त गरेका छन् ।
समाजसेवी पनेरुले यस अघि पनि स्कुलमा स्वर्गीय बुवा जगन्नाथ पनेरुको नाममा छात्रवृत्ति र आमा चन्द्रादेवि पनेरुको नामबाट चन्द्रादेवि प्रतिभा पुरस्कार र अशिग्राम मावि रुपालमा आफ्नो परिवार को तर्फबाट स्वर्गीय बुवाको स्मृतिमा सरस्वती मन्दिर स्थापना गरेका छन् ।
