धनगढीको प्रादेशिक आयुर्वेद चिकित्सालयबाट १५ महिनामा करिब साढे २१ हजारको उपचार

धनगढी: कैलालीको धनगढीमा रहेको प्रादेशिक आयुर्वेद चिकित्सालयमा एक वर्ष १६ हजारभन्दा बढीले उपचार गराएका छन्। गत आर्थिक वर्षमा आयुर्वेद चिकित्सालयबाट १६ हजार ३ सय ८० जना बिरामीको उपचार भएको हो।

कैलालीको धनगढी उपमहानगरपालिका–१३ मा रहेको प्रादेशिक आयुर्वेद चिकित्सालयमा बिरामीको संख्या बढी रहेको आयुर्वेदिक चिकित्सालयका वैद्यनिरीक्षक तथा सूचना अधिकारी सुरेन्द्रबहादुर शाहीले बताए। उनका अनुसार गत आर्थिक वर्षको असोज ११ गतेदेखि असार मसान्तसम्म विभिन्न रोगका ११ हजार २ सय महिला र ५ हजार १ सय १८ पुरुषले उपचार सेवा लिएका छन् ।

चालु आवको श्रावणदेखि कार्तिक मसान्तसम्म ५ सय ८५ जनाले ओपडी सेवा लिएको चिकित्सालयको तथ्याङ्क छ। सुदूरपश्चिम प्रदेशका सबै जिल्लाबाट बिरामी आउने गरेको सूचना अधिकारी शाहीले बताए । ‘ चिकित्सालयमा उपचार गराउन आउने बिरामीको सङ्ख्या बढ्दै गएको छ’ उनले भने ‘आयुर्वेद औषधिको साइड इफेक्ट कम हुने भएकाले पनि बिरामीको सङ्ख्या बढ्दैछ’। ‘नसर्ने रोगका लागि आयुर्वेदमा औषधिदेखि लिएर जीवनशैलीसम्बन्धी परामर्श हुन्छ, त्यसैले यसमा आकर्षण बढ्दो छ’ शाहीले भने । अन्यत्र औषधि गरेर थाकेका विरामीले आयुर्वेद चिकित्सालयमा आएर उपचार गराउँदा सन्चो भएको बिरामीले बताउने गरेको शाहीको दाबी छ। आयुर्वेद चिकित्सालयमा बाथ, अम्लपित्त र पेटको रोगका बिरामी बढी आउने गरेको शाहीले बताए ।

२०९७ असोज ११ बाट सेवा सुरु गरेको आयुर्वेद चिकित्सालयमा ओपिडी, एक्सरे, प्याथोलोजी, पूर्वकर्म, पञ्चकर्म सेवा सञ्चालनमा रहेको छ। चिकित्सालयमा १ जना होमियोपेथिक र ४ जना आयुर्वेद चिकित्सकले सेवा दिइरहेका छन् । चिकित्सायलयमा बिहान ५ देखि ७ बजेसम्म योग सेवा पनि सञ्चालनमा रहेको छ । चिकित्सालयले अस्पताल फार्मेसी, आइपिडी, पायल्स र फिष्टुलाको छारसुत्र (अप्रेशन) सेवाहरू सुरु गर्न लागेको सूचना अधिकारी शाहीले बताए ।

नेपाल सरकारबाट उपलब्ध हुने २३ थरीको औषधि चिकित्सालयबाट बिरामीलाई निःशुल्क प्रदान हुने गरेको बताए। गत वर्ष सबै उपचार सेवा नि:शुल्क गरिए पनि यो वर्षबाट ओपिडी टिकट, एक्सरे, ल्याव सेवाकोे न्यूनतम शुल्क लिने थालिएको छ। तर, अपाङ्गता भएका र जेष्ठ नागरिकलाई भने पूर्ण नि:शुल्क सेवा दिने व्यवस्था छ। चिकित्सालयबाट १५ महिनामा २१ हजार ४ सय ९८ जनाले उपचार सेवा लिएका छन । ( रासस)