सुदूरपश्चिममा राजनीतिक नियुक्ति विवाद चर्कियो, एमाले मन्त्रीद्वारा मन्त्रिपरिषद् बैठक बहिस्कार

धनगढी- सुदूरपश्चिम प्रदेश सरकारले गरिरहेको राजनीतिक नियुक्तिलाई लिएर सरकारभित्रै विवाद चर्किएको छ। उक्त विवादकै कारण नेपाल कम्युनिस्ट पार्टी (एमाले) का मन्त्रीहरूले आज मन्त्रिपरिषद् बैठक बहिस्कार गरेका छन्।
राजनीतिक नियुक्तिमा भागबन्डा नमिल्दा असन्तुष्टि बढेको हो। विशेषगरी जिल्ला अस्पतालहरूको अध्यक्ष नियुक्तिमा सहमति जुट्न नसक्दा विवाद उत्कर्षमा पुगेको बताइएको छ।
बैठक सुरु हुनुअघि आन्तरिक मामिला तथा कानुन मन्त्री हिरा सार्की केही समय मुख्यमन्त्री कार्यालय पुगे पनि बैठकमा सहभागी भएनन्। यस्तै, भौतिक पूर्वाधार विकास मन्त्री सुरेन्द्र पाल पनि अनुपस्थित रहे। एमालेका मन्त्रीहरू सामूहिक रूपमा बैठकमा नबस्ने निर्णयमा पुगेका थिए।
एमाले मन्त्रीहरू अनुपस्थित भएपछि मन्त्रिपरिषद् बैठकमा मुख्यमन्त्री कमल बहादुर शाह, आर्थिक मामिला मन्त्री बहादुरसिंह थापा र सामाजिक विकास मन्त्री मेघराज खड्का मात्र सहभागी भएका थिए।
बैठकले भने विभिन्न जिल्ला अस्पतालहरूमा अध्यक्ष नियुक्त गर्ने निर्णय गरेको छ। टिकापुर अस्पताल व्यवस्थापन समितिको अध्यक्ष पदमा सबैभन्दा बढी विवाद देखिएको थियो। उक्त पदमा एमालेले आफ्नो दाबी राख्दै आएकोमा कांग्रेसले आफ्ना निकट रामबहादुर भण्डारीलाई नियुक्त गरेपछि विवाद थप चर्किएको हो।
यसैबीच, दार्चुला जिल्ला अस्पतालको अध्यक्षमा तोरणप्रसाद अवस्थी, बैतडीमा धनबहादुर क्षेत्री, बाजुरामा धनबहादुर रावत र बझाङमा वीरेन्द्रबहादुर खड्का नियुक्त भएका छन्। बझाङ बाहेक अन्य अधिकांश अस्पतालका अध्यक्ष कांग्रेस निकट मानिएका छन्।
राजनीतिक भागबन्डा नमिल्दा सत्ता गठबन्धनभित्रै असन्तुष्टि बढ्दै गएको देखिएको छ।