बझाङ- बझाङको केदारस्यूँ गाउँपलिकामा रहेको भवानी माध्यमिक विद्यालयमा खानेपानी र घेरवारको समस्या भएको छ । केदारस्यूँ गाउँपालिका-१ स्थित डुडिलमा रहेको भवानी माध्यमिक विद्यालयमा लामोसमयदेखि खानेपानी र घेरवारको समस्या भएको हो ।
विद्यालयमा भएको पानी बिग्रेपछि अहिले विद्यालयमा पानीको हाहाकार भएको पाइन्छ । खानेपानी नहुँदा विद्यालयमा अध्यनरत ३ सय ५८ जनाभन्दा बढी विद्यार्थी,शिक्षक र कर्मचारी प्रभावित भएका छन् । २०३३ सालमा स्थापना भएको विद्यालयमा खानेपानी नहुँदा पठनपाठन कार्य पनि प्रभावित हुने गरेको शिक्षक रमेश रावलले जानकारी दिए । पानी अभावका कारण शिक्षक, कर्मचारी,विद्यार्थीलाई शौचालय प्रयोगमा समेत समस्या भएको शिक्षक रावलको भनाइ छ ।
शौचालयमा पनि टाढाबाट पानी बोकेर हाल्नुपर्ने हुदाँ धेरै समस्या हुने गरेको विद्यार्थीहरुको भनाई छ । विद्यालयमा पानी नहुँदा आधा एक घण्टा टाढा पानी खान जानुपर्ने हुदाँ पढाईमा बाधा हुने गरेको कक्षा ९ मा अध्ययनरत छात्रा राधिका बोहराको दुखेसो छ । विद्यालयमा पानी अभावले आफुहरु भन्दा धेरै सानो कक्षामा पढ्ने भाईबहिनीहरुलाई असहज भएको कक्षा १० मा अध्ययनरत छात्र मुकेश धामीले बताए ।
उक्त्त विद्यालयमा पहिले जर्मन विकास सहयोग (जिआइजेठ) संस्थाले ल्याइदिएको पानी अहिले त्यो बिग्रेबाट करिब ३ वर्ष यता पानीको अभाव रहेको छ । विद्यालयमा खानेपानी पानी छैन, पानीका लागि ५ किलोमिटर टाढा जानुपर्ने बाध्यता छ प्रधानाध्यापक दल बहादुर बोहराले भने,विद्यालयको पानी अवरुद्ध भएपछि समुदायको धाराको पानीको प्रयोग गर्दैआएको थियौं,उक्त धारामा समेत पानीको कमी हुनथालेपछि समस्या झन जटिल बनेको हो ।
पानीको समस्या हल गर्नका निम्ति केही समयअघि विद्यालयले गाउँपालिका मार्फत ४ सय मिटर पाइप मागेर पानी सुधार गरेपनि फेरि समस्या उस्तै रहेको छ । पानीको मुहानमा उपयुक्त ट्याङ्की नहुँदा जथाभावी फोहोर ट्याङ्की भित्री र पाइपमा पस्दा बारम्बार पानी अवरुद्ध हुने गरेको विद्यालयले जनाएको छ ।
घेरवार नहुँदा सुरक्षामा चुनौती
विद्यालयमा घेरवार नहुँदा सुरक्षामा समेत चुनौती थपिएको छ । बालकक्षा देखि १० सम्म अध्यापन हुने विद्यालयमा घेरवार नहुँदा जथाभावी रुपमा पशुचौपाय आवतजावत गर्दा समस्या भएको विद्यालय जनाएको छ । त्यस्तै घेरवार अभावकै कारणले भौतिक संरचना तोडफोडको जोखिम समेत तिब्र छ ।
विद्यालय घेरवार विहिन हुँदा दिउँसो जथाभावी पशुचौपाया आवतजावतको कारण पढाइमा समेत बाधा हुने गरेको शिक्षक कमल विकले बताए । उनका अनुसार जथाभावी आवतजावतले सरसफाइमा पनि समस्या थपिएकाे छ ।
विद्यालय स्थापना पश्चात् स्थानीय जनसमुदायले विद्यालयमा घेरवार निर्माण गरेको भएपनि अहिले जिर्ण भएर भत्किदा समस्या थपिएको हाे।
उक्त विद्यालयमा केदारस्यूँ गाउँपालिका-१ र ९ का विद्यार्थी अध्यन गर्ने गरेका छन् । विद्यालयको दयनीय अवस्था बारे सम्बन्धि निकायको ध्यानाकर्षण नभएको स्थानीय जनसमुदायको गुनासो छ ।
