धनगढी- सुदूरपश्चिम प्रदेशका विभिन्न जिल्लामा जेनजी आन्दोलनका क्रममा कम्तीमा ६५ वडाका कार्यालयमा आगजनी र तोडफोड भएको छ।
प्रदेश प्रहरी कार्यालय धनगढीका अनुसार सबैभन्दा बढी क्षति कञ्चनपुरको शुक्लाफाँटा नगरपालिका वडा नं ७ र ८ मा पुगेको छ। वडा नं ७ को कार्यालय पूर्णरूपमा जलेको छ भने वडा नं ८ मा करिब ५० लाख रुपैयाँ बराबरको क्षति भएको छ।
शुक्लाफाँटाका वडा नं २ देखि १२ सम्मका अधिकांश कार्यालय, कृष्णपुर नगरपालिका (वडा नं १, २, ५ र ७), पुनर्वास नगरपालिका, भीमदत्त नगरपालिका र बेल्डाँडी गाउँपालिकामा समेत आगजनी तथा तोडफोड भएको छ।
कैलाली जिल्लामा धनगढी उपमहानगरपालिका (वडा नं ४, ८ र १३), लम्कीचुहा, टिकापुर, गोदावरी, गौरीगङ्गा, घोडाघोडी नगरपालिकाका कार्यालयमा आगजनी र तोडफोड भएको छ। घोडाघोडीका सबै १२ वटा वडा कार्यालय जलेका छन्। यस्तै, कैलारी गाउँपालिकाका सबै ९ वटा वडा कार्यालय, बर्दगोरीया गाउँपालिकाका वडा नं १, २, ३, ५ र ६ तथा जोशीपुर गाउँपालिकाका वडा नं ५ र ७ मा पनि क्षति पुगेको छ।
बझाङको तलकोट गाउँपालिका वडा नं १ मा आन्दोलनकारीहरूले सामान बाहिर निकाली जलाएका थिए भने डडेल्धुराको नवदुर्गा गाउँपालिका वडा नं ५ र अमरगढी नगरपालिका कार्यालयमा तोडफोड भएको छ। अछाममा तुर्माखाँद गाउँपालिका वडा नं ३ र मंगलसैन नगरपालिका कार्यालयमा पनि तोडफोड भएको प्रहरीले जनाएको छ।
आन्दोलनपछि पनि अज्ञात समूहले तोडफोड र आगजनी जारी राखेका छन्। भदौ २६ गते राति दार्चुलाको दुहु गाउँपालिका वडा नं ३ कार्यालयमा आगजनी हुँदा कुर्सी, टेबल, दराज र ल्यापटप जलेका थिए। भदौ २८ गते राति शैल्यशिखर नगरपालिका वडा नं २ कार्यालयमा घुसपैठ गरी कागजातहरू च्यातिएका थिए। घोडाघोडी नगरपालिकामा भदौ २४ गते आगजनी भएपछि अर्को रात पनि बाँकी संरचनामा आगजनी गरिएको थियो।
डोटीको दिपायल सिलगढी नगरपालिकामा समेत कार्यालय तोडफोड र नगर बसमा आगजनी गरिएको प्रदेश प्रहरी कार्यालयले जनाएको छ।
