नेपालले वेस्ट इन्डिजलाई पराजित गर्दै युनिटी कप टी–२० शृङ्खला एक खेल अगावै जितेको छ। गएराती शारजाह क्रिकेट मैदानमा सम्पन्न खेलमा नेपालले वेस्ट इन्डिजलाई ९० रनले हराउँदै उपाधि आफ्नो पक्षमा पारेको हो।
यसअघि पहिलो खेलमै वेस्ट इन्डिजलाई हराएर ऐतिहासिक जित हासिल गरेको नेपालले दोस्रो खेलमा पनि उत्कृष्ट प्रदर्शन गर्दै शृङ्खला पक्का गरेको हो।
टस जितेर पहिला ब्याटिङ गरेको नेपालले २० ओभरमा ६ विकेटको क्षतिमा १७३ रनको चुनौतीपूर्ण योगफल खडा गरेको थियो। नेपालका लागि आसिफ शेखले ४७ बलमा ८ चौका र २ छक्कासहित अविजित ६८ रन प्रहार गरे। त्यस्तै, सन्दीप जोराले ३९ बलमा ५ छक्का र ३ चौका प्रहार गर्दै ६३ रन जोडे। मोहम्मद आदिल आलमले ११ रन योगदान गरे।
जवाफी ब्याटिङमा उत्रिएको वेस्ट इन्डिज १७.१ ओभरमै ८३ रनमा अलआउट भयो। वेस्ट इन्डिजका लागि जेसन होल्डरले १५ बलमा २ छक्कासहित सर्वाधिक २१ रन बनाए भने एकिम अगष्टले १७ र अमिर जांगोले १६ रन जोडे।
नेपालको बलिङतर्फ आदिल आलमले ४ विकेट लिँदा कुशल भुर्तेलले ३, ललित राजवंशी र दीपेन्द्रसिंह ऐरीले समान १–१ विकेट हात पारे। वेस्ट इन्डिजका लागि कप्तान अकिल होसेन र कायल मायर्सले समान २–२ विकेट लिँदा जेडिया ब्लेड्सले १ विकेट लिए।
यससँगै नेपालले युनिटी कप टी–२० शृङ्खलाको उपाधि जित्दै ऐतिहासिक उपलब्धि हात पारेको छ।
