डडेल्धुरा- डडेल्धुरा अस्पतालले विश्व स्तनपान सप्ताह विविध कार्यक्रमहरूसहित सुरु गरेको छ। स्तनपान अमृत समान भन्ने नारासहित आज अस्पतालले उक्त कार्यक्रमको सुरुवात गरेको हो ।
आज अस्पताल व्यवस्थापन समिति अध्यक्ष करुणाकर ओझाको अध्यक्षतामा स्तनपान सप्ताह कार्यक्रमको शुभारम्भ गरिएको हो ।
सप्ताहको पहिलो दिनमै अस्पताल परिसर सांगीतिक गीत, जनचेतनामूलक नाटक, र स्वास्थ्य शिक्षामूलक सन्देशहरूले गुञ्जायमान बन्यो। नर्सिङ अधिकृत नाओमी बुढाका अनुसार, स्तनपानका फाइदा, आमाको दूधको महत्व, र स्तनपानलाई बच्चाको पहिलो खोपको रूपमा प्रस्तुत गर्दै सन्देश प्रवाह गर्ने उद्देश्यले कार्यक्रम आयोजना गरिएको हो।
कार्यक्रमको प्रमुख आकर्षण “बच्चा जन्मिएको १ घण्टा भित्र स्तनपान सुरु गरौं” भन्ने सन्देशमा आधारित नाटक रह्यो, जसले दर्शकहरूलाई स्तनपानको तत्काल सुरुवातको महत्वबारे सचेत गरायो। त्यसपछि प्रस्तुत गरिएका लोकगीत तथा आधुनिक गीतहरूले आमाको माया र दूधको अमूल्यता गाएर कार्यक्रमलाई थप प्रभावशाली बनाएको थियो।
स्वास्थ्य क्षेत्रमा सक्रिय विभिन्न निकायहरूको सहभागिता रहेको कार्यक्रममा डडेल्धुरा अस्पतालकी मेडिकल सुपरिटेन्डेन्ट डा. सुधा देवकोटा, नर्सिङ प्रमुख टिका रावत, अमरगढी नगरपालिकाका स्वास्थ्य प्रमुख श्यामराज बोहरा, बहुउद्देश्यीय विकास समाजका प्रकाश मडैं, र स्वास्थ्य कार्यालय डडेल्धुराका हरिप्रसाद भट्ट लगायत सयभन्दा बढी व्यक्तिहरूको उपस्थिति रहेको थियोे ।
कार्यक्रममा “स्तनपान बच्चाको पहिलो खोप हो” भन्ने सन्देशका साथ छ महिनासम्म पूर्ण स्तनपान र त्यसपछि दुई वर्षसम्म निरन्तर स्तनपान गराउनुपर्ने सल्लाह दिइएको थियोे । साथै मातृत्व पोषण, स्तनपानको मात्रा र त्यसको दीर्घकालीन स्वास्थ्य प्रभावबारे समेत जानकारी पनि प्रदान गरिएको थियोे ।
