बझाङ- बझाङको केदारस्यूँ गाउँपालिका स्वास्थ्य शाखाले नर्सिङ कर्मचारीलाई स्वास्थ्य सामाग्री वितरण गरेको छ । स्वास्थ्य सेवामा खटिएका कर्मचारीहरूको कामलाई थप सहज बनाउन सोमबार ९ जना नर्सिङ कर्मचारीलाई आवश्यक सामग्रीहरू वितरण गरेको हो।
सोमबार गरिएको पालिका स्तरीय उत्तर प्रस्तुति घर भेट पिएनसी, होम भिजिट कार्यक्रमको वार्षिक समिक्षा गोष्ठीको अवसरमा झोला, छाता, वि.पि. सेट (रक्तचाप मापन यन्त्र), र थर्मोमिटर वितरण गरिएको छ ।
गाउँपालिकाका स्वास्थ्य शाखा प्रमुख अम्मराज बिष्टका अनुसार, “सामग्री वितरणको उद्देश्य कर्मचारीहरूको कार्यदक्षता अभिवृद्धि गर्नुका साथै स्वास्थ्य सेवा प्रवाहमा थप सहजता ल्याउनु रहेको छ।
कार्यक्रममा बोल्दै पालिका अध्यक्ष गणेशबहादुर बोहराले स्वास्थ्यकर्मीहरूलाई गर्भवती महिलाहरूको घरमै पुगेर आवश्यक सल्लाह, जाँच र सुझाव दिन आग्रह गर्नुभयो।
“हामी अब हरेक महिलाले स्वास्थ्य संस्थामै सुरक्षित रूपमा सन्तान जन्माएको देख्न चाहन्छौँ,” अध्यक्ष बोहराले भन्नुभयो, “स्वास्थ्यकर्मीहरू भगवान्को रूप हुन्। सेवा प्रवाहमा कुनै पनि लापरबाही नगरिकन समर्पित भावनासाथ सेवा दिनुहोला।”
उनले पालिकाले स्वास्थ्य क्षेत्रलाई पहिलो प्राथमिकतामा राखेको पनि स्पष्ट पार्नुभयो।
नर्सिङ कर्मचारीहरूले आफूहरूको कार्यमा प्रत्यक्ष उपयोगी सामग्री प्राप्त भएकोमा खुसी व्यक्त गरेका छन्।
कार्यक्रममा अध्यक्ष बोहरा , उपाध्यक्ष मनिषा धामी वडाध्यक्ष तथा स्वास्थ्य शाखाका प्रतिनिधिहरूको उपस्थितिमा सो कार्यक्रम सम्पन्न भएको हो।
