डडेल्धुरा: धार्मिक, ऐतिहासिक र पर्यटकीय महत्व बोकेको हुलाक डाँडामा अमरगढी नगरपालिकाले २०७९ मंसिर १० गतेदेखि फोहोर जलाउँदै आएको छ। नगर प्रमुख डिलीराज जोशी र प्रमुख प्रशासकीय अधिकृत लक्ष्मी प्रसाद उपाध्याय नेतृत्वको पालिकाले पटक–पटक ताकेता गर्दा पनि समस्या समाधान नगरेको स्थानीयको गुनासो छ।
हुलाक डाँडा गोरखा भर्ती पदमार्ग, धार्मिक स्थल तथा पर्यटक आकर्षणको केन्द्र भएकाले वातावरणीय र सामाजिक दृष्टिले अत्यन्त संवेदनशील मानिन्छ। तर, त्यही ठाउँमा फोहोर जलाउँदा प्रदूषण, जनस्वास्थ्यमा असर र आगलागीको खतरा बढिरहेको छ।
नगरपालिकाले फोहोर व्यवस्थापनका लागि वैकल्पिक स्थानमा जमिन खरिद गरिसकेको भए पनि हालसम्म त्यसको प्रयोग नगरी पुरानै स्थानमा फोहोर जलाउँदै आएको छ। यसबाट नगरपालिकाको उदासीनता र गैरजिम्मेवारपन झल्किएको छ।
स्थानीय बासिन्दाहरूले मेयर डिलीराज जोशीलाई अघिल्लो निर्वाचनमा असहयोग गरेको भन्दै उनीहरूलाई निसाना बनाइएको आरोप लगाएका छन्। फोहोर व्यवस्थापनका वैकल्पिक विकल्प हुँदाहुँदै जानाजानी यही क्षेत्रलाई प्रयोग गर्नु बदनियतपूर्ण कार्य भएको उनीहरूको भनाइ छ।
“पर्यावरण संरक्षण ऐन, २०७६” र “सार्वजनिक स्वास्थ्य ऐन, २०१८” अनुसार यस्तो कार्य गैरकानुनी, जनस्वास्थ्यविपरित र दण्डनीय हो। वातावरणीय प्रभाव मूल्यांकन विना सार्वजनिक क्षेत्रमा फोहोर जलाउनु कानुनविपरीत ठहरिन्छ।
स्थानीय समाजसेवी, युवाहरू र सरोकारवाला समूहहरू मिलेर नगरपालिका विरुद्ध विरोध कार्यक्रमको तयारीमा जुटिरहेका छन्। उनीहरूले ज्ञापनपत्र बुझाउने, ढोका घेराउ, र ध्यानाकर्षण कार्यक्रमको योजना बनाएका छन्। आन्दोलनले थप रूप लिन सक्ने संकेतसमेत देखिएको छ।
