कैलाली : राष्ट्रिय स्वतन्त्र पार्टी (रास्वपा) भित्र पछिल्लो समय विभिन्न विवादहरू सतहमा आएका छन् । सुदूरपश्चिम प्रदेशका नेताहरूले भारतमा अवैध रूपमा चन्दा संकलन गरेको आरोपसँगै पार्टी सभापति रवि लामिछाने पनि सहकारी ठगी प्रकरणमा मुछिएका छन्, जसले पार्टीको छविमा गम्भीर असर पार्न सक्ने देखिएको छ ।
सुदूरपश्चिम प्रदेशमा रास्वपाका प्रदेश सभापति ई. प्रकाश विष्ट र महामन्त्री सन्तोष जोशीमाथि पार्टीको नियमविपरीत भारतमा चन्दा संकलन गरेको आरोप लागेको छ । पार्टी कार्यकर्ता गजेन्द्र सिंहले सामाजिक सञ्जालमार्फत यी नेताहरूले गैरकानुनी रूपमा चन्दा उठाएको दाबी गरेका थिए । सिंहले आफ्नो पोस्टमा स्थानीय तहको उपनिर्वाचनका लागि उम्मेदवारको नाममा रकम संकलन गरिएको समेत उल्लेख गरेका थिए ।
यो विषयमा पार्टीका प्रवक्ता तथा महामन्त्री सन्तोष जोशीले आरोप अस्वीकार गर्दै सिंहविरुद्ध कानुनी कारबाही गर्ने बताएका छन् । यद्यपि, हालसम्म कुनै कानुनी कदम चालिएको देखिएको छैन । सिंहले आफ्नो पोस्ट पछि हटाएका छन्, जसलाई पार्टीको दबाबको परिणाम मानिएको छ। तर, रास्वपा सुदूरपश्चिम प्रदेशले यसबारे आधिकारिक धारणा सार्वजनिक गरेको छैन। गजेन्द्र सिंग प्रहरी संगठनकाबाट रिटाइड हवल्दार समेत हुन् । उनलाई अहिले पार्टिले साधारण सदस्य बाट समेत हटाएको महामन्त्री जोशिले बताएका छन ।
रास्वपा पछिल्लो समय यस्तै घटनाहरूको भद्रगोलमा देखिन्छ । केही समय देखि रास्वपाका सभापति रवि लामिछाने सहकारीको रकम अपचलन गरेको आरोपमा पक्राउ परेका थिए । उनलाई केन्द्रीय अनुसन्धान ब्यूरो (सीआईबी) को टोलीले काठमाडौंस्थित पार्टी कार्यालयबाट पक्राउ गरेको हो। लामिछानेमाथि सूर्यदर्शन सहकारीको रकम गोर्खा मिडिया नेटवर्क प्रा.लि.मा अपचलन गरेको आरोप लागेको छ।
सूर्यदर्शन सहकारीमा बचतकर्ताको रकम अनियमितता भएको प्रकरणमा पूर्वअध्यक्ष जीबी राई लगायतका व्यक्तिहरूविरुद्ध कास्की अदालतमा मुद्दा दर्ता भएको थियो। पीडितहरूले लामिछानेसहित १८ जनाविरुद्ध कास्की प्रहरीमा पूरक जाहेरी दिएका थिए। संसदीय विशेष छानबिन समितिले पनि लामिछानेलाई दोषी ठहर गर्दै कारबाही सिफारिस गरेको थियो।
लामिछानेले भने आफूलाई निर्दोष दाबी गर्दै आएका छन्। पक्राउ पर्नुअघि उनले कार्यकर्तालाई सम्बोधन गर्दै अनुसन्धानमा सघाउन तयार रहेको बताएका थिए। तर, उनले आफूविरुद्ध निरन्तर षड्यन्त्र भइरहेको आरोप पनि लगाए।
यी घटनाहरूले रास्वपाको छविमा गम्भीर असर परेको छ। पार्टीभित्रको आन्तरिक विवाद र शीर्ष नेतृत्वमाथि लागेको आरोपले पार्टीप्रति जनताको विश्वासमा कमी आइरहेको छ । विशेषगरी, सभापति लामिछानेमाथि लागेको सहकारी ठगीको आरोपले पार्टीको नैतिक धरातललाई कमजोर बनाएको छ।
रास्वपाले आफूलाई पारदर्शी र इमानदार पार्टीको रूपमा प्रस्तुत गर्दै आएको थियो। तर, पछिल्ला घटनाक्रमले पार्टीभित्र पनि अन्य दलहरूजस्तै अनियमितता र विवाद रहेको देखाएको छ। यसले आगामी दिनमा पार्टीको राजनीतिक यात्रामा चुनौती थप्न सक्ने देखिएको छ
राष्ट्रिय स्वतन्त्र पार्टीभित्रका पछिल्ला विवादहरूले पार्टीको आन्तरिक व्यवस्थापन र नेतृत्व क्षमतामाथि प्रश्न उठाएका छन्। यी घटनाहरूले पार्टीको छविमा नकारात्मक असर पार्न सक्ने भएकाले नेतृत्वले छिटो र प्रभावकारी कदम चाल्न आवश्यक देखिन्छ। पार्टीले यी आरोपहरूको निष्पक्ष छानबिन गरी दोषीलाई कारबाही गर्ने र पारदर्शिता कायम गर्ने प्रतिबद्धता जनाउनुपर्छ, जसले मात्र पार्टीप्रति जनताको विश्वास पुनःस्थापित गर्न सकिन्छ।
