बझाङ- बझाङकाे तलकोट गाउँपालिकास्थित देवशैन पुल निर्माणमा काम गरेका मजदुरहरूले वर्षौँसम्म पनि आफूहरूले पाउनुपर्ने ज्याला नपाएको भन्दै बिहीबार चैनपुर-तलकोट सडकअन्तर्गत बस्टी क्षेत्रमा सडक अवरुद्ध गरेका छन्।
लामाे समयसम्म पुल निर्माणमा गरेको श्रमको पारिश्रमिक भुक्तानीका लागि पटक-पटक सम्बन्धित निकायको ध्यानाकर्षण गराउँदा पनि कुनै सुनुवाइ नभएपछि बाध्य भएर सडक अवरुद्ध गर्नुपरेको आन्दोलित स्थानीयले बताएका छन।
मजदुरहरूले आफूहरूले इमान्दारीपूर्वक काम सम्पन्न गरे पनि वर्षौँदेखि ज्याला नपाउँदा आर्थिक संकट झेल्नुपरेको, दैनिक जीविकोपार्जनसमेत प्रभावित भएको बताएका छन्। उनीहरूले आफूहरूको उचित पारिश्रमिक तत्काल उपलब्ध गराउन सम्बन्धित निकायसँग माग गरेका छन्।
आन्दोलनरत स्थानीयले आफ्नो माग पूरा नभएसम्म सडक अवरोध नहटाउने चेतावनी दिएका छन्।
सडक अवरुद्ध भएपछि चैनपुर-तलकोट सडकखण्डमा चल्ने सवारीसाधन सञ्चालन प्रभावित भएको छ। सडक बन्द हुँदा यात्रुहरू बीचमै अलपत्र परेका छन् भने अत्यावश्यक कामका लागि यात्रा गर्ने सर्वसाधारणले समेत सास्ती खेप्नुपरेको छ।
स्थानीयले समस्या समाधानमा सम्बन्धित निकायले तत्काल पहल गरी मजदुरहरूको बाँकी ज्याला भुक्तानी गर्नुपर्ने माग गरेका छन्।
