प्रतिनिधि सभा निर्वाचन २०८२ : प्रत्यक्षतर्फ मतगणना अन्तिम चरणमा, ४ सिटको नतिजा आउन बाँकी

प्रतिनिधि सभा सदस्य निर्वाचन २०८२ अन्तर्गत प्रत्यक्षतर्फको मतगणना अन्तिम चरणमा पुगेको छ। अब केवल चार वटा निर्वाचन क्षेत्रको नतिजा सार्वजनिक हुन बाँकी रहेको छ।
पछिल्लो मत परिणामअनुसार राष्ट्रिय स्वतन्त्र पार्टी, नेपाली कांग्रेस र नेकपा एमालेले एक–एक सिटमा अग्रता बनाइरहेका छन्। राष्ट्रिय स्वतन्त्र पार्टीले गोरखा–१ मा अग्रता कायम राखेको छ भने नेपाली कांग्रेसले इलाम–१ मा र नेकपा एमालेले सङ्खुवासभा–१ मा अग्रता बनाइरहेको छ।
यता धनुषा–१ को मत परिणाम भने हाल सार्वजनिक नगर्ने निर्णय निर्वाचन आयोगले गरेको जनाएको छ।
हालसम्म सार्वजनिक नतिजाअनुसार राष्ट्रिय स्वतन्त्र पार्टीले सबैभन्दा धेरै १२४ सिट जित्दै अग्रस्थानमा रहेको छ। दोस्रो स्थानमा रहेको नेपाली कांग्रेसले १७ सिट जितेको छ भने नेकपा एमालेले ८ सिटमा जित हात पारेको छ।
त्यसैगरी नेपाली कम्युनिस्ट पार्टी ७ सिटसहित चौथो स्थानमा रहेको छ। श्रम संस्कृति पार्टीले ३ सिट जितेको छ भने राष्ट्रिय प्रजातन्त्र पार्टीले १ सिटमा विजय हासिल गरेको छ। यसका साथै एक जना स्वतन्त्र उम्मेदवार पनि विजयी भएका छन्।