बैतडीबाट जन्ती बोकेर बझाङ जाँदै गरेको बस दुर्घटना हुँदा ८ जनाको मृत्यु भएको छ। जिल्लाको पुर्चौडी नगरपालिका–७ भौनीबाट जन्ती बोकेर बझाङको बित्थडचिर गाउँपालिका–७ सुनकुडातर्फ फर्किरहेको बस पुर्चौडी नगरपालिका–७ बढ्गाउँ मोडमा दुर्घटना हुँदा ६ जनाको घटनास्थलमै र २ जनाको उपचारका क्रममा मृत्यु भएको हो।
पवनदूत यातायातको सुप प्र ०२–००१ ख १११९ नम्बरको बस दुर्घटनामा परेको जिल्ला प्रहरी कार्यालय बैतडीका डीएसपी दिपक कुमार रायले जानकारी दिएका छन्।
दुर्घटनामा ३२ जना घाइते भएका छन्। उनीहरूलाई कोटीला स्वास्थ्य चौकीमा उपचारका लागि लगिएको छ। घाइतेमध्ये ३ जनाको अवस्था चिन्ताजनक रहेको प्रहरीले जनाएको छ।
घटनाको जानकारी पाएलगत्तै पुर्चौडी र ढोल्यामोडबाट प्रहरी टोली खटिएको छ। दुर्घटनाको कारणबारे थप अनुसन्धान भइरहेको प्रहरीले जनाएको छ।
मृतकहरूको नामावली
केशब राज जोशी (४०) – बित्थडचिर गाउँपालिका–७, बझाङ
अशोक राज जोशी (१३) – बित्थडचिर गाउँपालिका–७, बझाङ
बसन्त जोशी (३५) – बित्थडचिर गाउँपालिका–७, बझाङ
बिष्णुदत्त जोशी (४१) – बित्थडचिर गाउँपालिका–७, बझाङ (उपचारका क्रममा)
नरेश राज जोशी (४२) – बित्थडचिर गाउँपालिका–७, बझाङ (उपचारका क्रममा)
मोहनदेव भट्ट (६०) – केदारस्यु गाउँपालिका, बझाङ
बसन्त राज रतला (४०) – जयपृथ्वी नगरपालिका–७, बझाङ
पुष्पा अवस्थी (४०) – पुर्चौडी नगरपालिका–७, बैतडी
