अछाम- नेकपा एमालेका प्रतिनिधिसभा सदस्य उम्मेदवार दिपक साउँदले सहिदहरूका सालिकमा माल्यार्पण गरेका छन् ।
जिल्लाको रामारोशन गाउँपालिका-६ भटाकाटियाँमा अवस्थित सहिद स्तम्भ तथा सहिदका सालिकमा पुगेर साउँदले सहिदप्रति श्रद्धा, सम्मान र कृतज्ञता प्रकट गर्दै माल्यार्पण गरेका हुन्। सहिदको बलिदानकै कारण आज देशमा लोकतन्त्र, शान्ति र जनताको अधिकार स्थापित भएको उल्लेख गर्दै उनले सहिदका सपना साकार पार्न आफू राजनीतिमा सक्रिय भएको बताए।
कार्यक्रममा बोल्दै साउँदले भने,“सहिदहरू कुनै एक पार्टीका होइनन्, उनीहरू सिङ्गो राष्ट्रका साझा गहना हुन्। उनीहरूको त्याग, संघर्ष र बलिदानले हामीलाई जिम्मेवार बनाएको छ। सहिदको सपना पूरा गर्नु नै मेरो राजनीतिक यात्रा हो।”
जनयुद्धका क्रममा ज्यान गुमाएका सहिद परिवारलाई भेट्दै साउँदले आफू पनि सहिद परिवारकै सदस्यझैँ रहेको बताए । सहिद परिवारका दुःख, पीडा र अपेक्षालाई आत्मसात गर्दै उनीहरूसँग भावनात्मक भेटघाट गरेका थिए।
सहिद स्तम्भ र सालिकमा माल्यार्पण पश्चात् साउँद परिवन सुतारको चुनावी घरदैलोमा अघि सरेका छन् । बान्नीगढी जयगढ गाउँपालिकाका विभिन्न बस्तीबाट चुनावी घरदैलोमा निस्किएका साउँद अहिले रामारोशन गाउँपालिका पुगेका हुन् । घरदैलोका क्रममा उनले स्थानीय बासिन्दासँग प्रत्यक्ष भेटघाट गर्दै अछामको विकास, रोजगारी, शिक्षा, स्वास्थ्य र सडक पूर्वाधारलाई प्राथमिकतामा राखेर काम गर्ने प्रतिबद्धता जनाए।
स्थानीयले पनि साउँदलाई आशा र विश्वासका साथ स्वागत गर्दै अछामको मुहार फेर्ने सक्षम नेतृत्वको रूपमा अघि बढ्न शुभकामना दिएका छन्। माल्यार्पण कार्यक्रममा नेकपा एमाले सुदूरपश्चिम अध्यक्ष कृष्णप्रसाद जैसी लगायतका जिल्ला स्थित नेताकार्यकर्ताको उपस्थिति रहेको थियोे ।
फागुन २१ मा हुने प्रतिनिधिसभा निर्वाचनलाई लक्षित गर्दै साउँदले अछाम क्षेत्र नं १ मा जनताको मत र समर्थनसहित ऐतिहासिक जित हासिल गर्ने विश्वास व्यक्त गरेका छन्।
