काठमाडौं । नेपालकै अग्रणी औषधि उद्योग देउराली–जनता फार्मास्युटिकल्स प्रा.लि.ले औषधि उत्पादन क्षमता विस्तार गर्ने उद्देश्यसहित चितवनको भरतपुरमा अत्याधुनिक नयाँ कारखाना स्थापना गर्ने निर्णय गरेको छ। कम्पनीले उक्त परियोजनामा थप ४७५ करोड रुपैयाँ लगानी गर्ने जनाएको छ।
कम्पनीको ३५ औँ वार्षिकोत्सवका अवसरमा मंगलबार आयोजित कार्यक्रममा देउराली–जनताका कार्यकारी निर्देशक हरिभक्त शर्माले अन्तर्राष्ट्रिय मापदण्डअनुसार निर्माण हुने उक्त नयाँ कारखाना दुई वर्षभित्र सम्पन्न गर्ने लक्ष्य रहेको जानकारी दिए। उनका अनुसार परियोजना सम्पन्न भएपछि करिब ५५० जनालाई प्रत्यक्ष रोजगारीको अवसर सिर्जना हुनेछ।
देउराली–जनता विगत ३५ वर्षदेखि अत्यावश्यक जीवनरक्षक औषधिहरू स्वदेशमै उत्पादन गर्दै आएको नेपालकै अग्रणी औषधि उद्योग हो। हाल कम्पनीले क्याप्सुल, ट्याब्लेट, लिक्विड, ओइन्टमेन्ट, ड्राइ पाउडरलगायत २९६ प्रकारका औषधि उत्पादन गरिरहेको छ। अन्तर्राष्ट्रिय स्तरका WHO-GMP, ISO 9001 र ISO 14001 प्रमाणपत्र प्राप्त यस उद्योगले औषधि आयातमा रहेको निर्भरता घटाउँदै मुलुकलाई आत्मनिर्भर बनाउने दिशामा महत्वपूर्ण योगदान पुर्याउँदै आएको छ।
कार्यक्रममा वितरण गरिएको प्रेस वक्तव्यअनुसार नयाँ कारखाना स्थापना भएसँगै उत्पादन विविधीकरण, गुणस्तर सुधार तथा अन्तर्राष्ट्रिय बजारमा नेपाली औषधिको प्रतिस्पर्धात्मक क्षमता वृद्धि हुने विश्वास लिइएको छ।
वक्तव्यमा उल्लेख भएअनुसार देउराली–जनता फार्मास्युटिकल्सले अत्याधुनिक प्रविधि प्रयोग गरी जीवनरक्षक तथा दीर्घ रोग उपचारमा आवश्यक पर्ने औषधिहरूको अनुसन्धान, उत्पादन र गुणस्तर परीक्षण गर्दै आएको छ। विश्वका विभिन्न मुलुकबाट उच्च शिक्षा हासिल गरेका दक्ष वैज्ञानिक, प्राविधिक तथा अन्य तहका करिब ६७५ जना कर्मचारीहरूको योगदानले देउराली–जनतालाई नेपाली औषधि उद्योगको विश्वसनीय नामका रूपमा स्थापित गराएको कम्पनीको भनाइ छ।
३५ औँ वार्षिकोत्सवका अवसरमा कम्पनीले विगतका अनुभवलाई आत्मसात गर्दै औषधिको गुणात्मक स्तर वृद्धि गरी औषधि उत्पादन क्षेत्रमा राष्ट्रलाई आत्मनिर्भर बनाउने प्रतिबद्धता व्यक्त गरेको छ। देउराली–जनता अन्तर्राष्ट्रिय प्रविधि हस्तान्तरणमार्फत उच्चस्तरीय औषधि उत्पादन गर्ने नेपालकै पहिलो उद्योगका रूपमा परिचित रहेको पनि वक्तव्यमा उल्लेख छ।
कम्पनीले कुशल संस्थागत व्यवस्थापन, प्रशासनिक पारदर्शिता, सामाजिक उत्तरदायित्व तथा अन्तर्राष्ट्रिय स्तरको उत्पादन प्रणालीलाई प्राथमिकतामा राख्दै विज्ञानमा आधारित गुणस्तरीय औषधि उत्पादनलाई निरन्तर अघि बढाइरहेको जनाएको छ।
नयाँ परियोजना सफल बनाउन देउराली–जनताले नेपाल सरकार, सम्बन्धित निकाय, चिकित्सक, औषधि व्यवसायी, सञ्चारकर्मी तथा सम्पूर्ण सरोकारवालाको सहयोग र सहकार्यको अपेक्षा गरेको छ। कम्पनीले आगामी दिनमा पनि जनस्वास्थ्यको क्षेत्रमा नवीन प्रविधि र उच्च गुणस्तरका औषधि उत्पादनमार्फत अग्रणी भूमिका निर्वाह गर्ने प्रतिबद्धता व्यक्त गरेको छ।
मिति: २०८२ माघ २० गते, मंगलबार
