बझाङ: यही फागुन २१ गते हुने निर्वाचन नजिकिँदै जाँदा देशभरका राजनीतिक दलहरू उम्मेदवार छनोटको अन्तिम चरणमा पुगेका छन्। यसैक्रममा नेकपा एमालेले अधिकांश जिल्लामा उम्मेदवार टुंगो लगाइसकेको भए पनि केही स्थानमा भने नाम हेरफेर गरिएको छ।
हिजो मात्रै उम्मेदवार सिफारिस गरेको नेकपा एमालेले बझाङ जिल्लामा भने आज उम्मेदवार परिवर्तन गरेको छ। जिल्लाका जनताको मनोभावना, संगठनभित्रको सन्तुलन तथा युवापुस्ताको अपेक्षालाई मध्यनजर गर्दै हिजो सिफारिस गरिएका अफिलाल ओखेडालाई ब्याक गरी आज ऐन महरलाई उम्मेदवारका रूपमा सिफारिस गरिएको एमाले स्रोतले जनाएको छ।
ऐन महर नेकपा एमालेका केन्द्रीय सदस्य तथा बझाङ जिल्ला इन्चार्ज समेत हुन्। उनी पार्टीको पछिल्लो केन्द्रीय अधिवेशनमा सबैभन्दा लोकप्रिय मत ल्याएर केन्द्रीय सदस्यमा निर्वाचित भएका नेतामध्ये एक हुन्। लामो समयदेखि संगठन निर्माण, जनसम्पर्क र जिल्लाको राजनीतिक गतिविधिमा सक्रिय महरलाई उम्मेदवार बनाउने निर्णयले एमालेभित्र उत्साह थपिएको नेताहरूको भनाइ छ।
उम्मेदवार फेरबदलको निर्णयलाई एमालेले स्थानीय जनचाहना र जित सुनिश्चित गर्ने रणनीतिक कदम का रूपमा व्याख्या गरेको छ। जिल्लामा संगठन सुदृढीकरण र कार्यकर्ताबीचको एकतालाई बलियो बनाउने उद्देश्यसहित गरिएको यस निर्णयले बझाङको चुनावी प्रतिस्पर्धा अझ रोचक बन्ने संकेत देखिएको छ।
फागुन २१ नजिकिँदै जाँदा बझाङमा दलहरूबीचको राजनीतिक सरगर्मी थप बढ्ने देखिएको छ
Advertisement
