धनगढी– तराई-मधेशका धेरैजसो ठाउँमा आज हुस्सु लागेको छ । सुदूरपश्चिम, कोशी, मधेश र लुम्बिनी प्रदेशका तराई भागमा हुस्सु-कुहिरो तथा बाँकी तराई भागका थोरै ठाउँमा हुस्सु लागेको हो । देशभर पश्चिमी वायूको आंशिक प्रभाव रहेको जल तथा मौसम पूर्वानुमान महाशाखाले जनाएको छ । सुदूरपश्चिमको कैलाली कञ्चनपुर सहित देशभर चिसो बढेको छ । बाक्लो हुस्सु र चिसो बढेपछि जनजीवन प्रभावित भएको छ। चिसोका कारण बिहान–बेलुका सवारी आवागमनमा समस्या देखिएको छ भने बालबालिका, वृद्धवृद्धा र बिरामी बढी प्रभावित भएका छन्। चिसो बढेसँगै विद्यालय, बजार र दैनिक कामकाजसमेत प्रभावित बनेको छ।
साथै दक्षिण–पश्चिम बङ्गालको खाडीमा विकसित न्यूनचापीय प्रणालीको समेत आंशिक प्रभाव रहेको छ । कोशी, मधेश, बागमती र गण्डकी प्रदेशमा मौसम आंशिक बदली रही बाँकी पहाडी तथा हिमाली भागमा मौसम मुख्यतया सफा रहेको महाशाखाले जनाएको छ ।
चिसोबाट जोगिन न्यानो कपडा लगाउन, तातो झोलिलो खान, काम नपरी घरबाहिर ननिस्कन, बालबालिका, वृद्धवृद्धा र दिर्घरोगीको विशेष ख्याल गर्न डाक्टरको सल्लाह छ ।
