बझाङ- बझाङको बित्थडचिर गाउँपालिकामा खेल मैदान निर्माण तथा सुधार कार्यका क्रममा भ्रष्टाचार भएको ठहर गर्दै अख्तियार दुरुपयोग अनुसन्धान आयोगले ६ जनाविरुद्ध विशेष अदालतमा आरोप–पत्र दायर गरेको छ।
अख्तियारका अनुसार बित्थडचिर गाउँपालिका वडा नम्बर–१ स्थित बित्थड खेल मैदान निर्माण तथा सुधार कार्यमा वास्तविक काम नगरी काम सम्पन्न भएको देखाउँदै झुट्टा नापी किताब, बिल, भरपाईलगायत कागजात तयार गरिएको पाइएको छ।
यसै आधारमा बढी तथा दोहोरो रकम भुक्तानी दिइएको पुष्टि भएपछि उक्त कार्यमा भ्रष्टाचार भएको निष्कर्ष निकालिएको अख्तियारले जनाएको छ।
आरोप–पत्र दायर गरिएकामा बित्थडचिर गाउँपालिकाका तत्कालीन निमित्त प्रमुख प्रशासकीय अधिकृत चक्रदेव भट्टसहित ६ जना प्रतिवादी रहेका छन्।
अख्तियारले भ्रष्टाचार निवारण ऐन, २०५९ को दफा ८ को उपदफा (१) को देहाय (घ) बमोजिमको कसुरमा प्रतिवादीहरूबाट रु. १४ लाख ६६ हजार ५०३ रुपैयाँ १२ पैसा बिगो कायम गर्दै सोही ऐनअनुसार कैद तथा बिगो बराबरको जरिवाना गरी असुल उपर गर्न मागदाबी लिएको जनाएको छ।
स्थानीय तहमा हुने विकास निर्माणका कार्यमा भएको अनियमिततामाथि कडाइका साथ अनुसन्धान र कारबाही जारी रहने अख्तियारले स्पष्ट पारेको छ।
