काठमाण्डौ- दोस्रो संस्करणको नेपाल प्रिमियर लिग (एनपीएल) क्रिकेटमा आज एउटा रोमाञ्चक खेल हुँदैछ। दिउँसो ४ बजे काठमाण्डौ गुर्खाज र सुदूरपश्चिम रोयल्स एक–अर्कासँग भिड्न लागेका छन्।
उद्घाटन खेलमा काठमाण्डौले साविक विजेता जनकपुर बोल्ट्सलाई ५ विकेटले हराउँदै उत्कृष्ट सुरुआत गरेको छ। सुदूरपश्चिम रोयल्स भने आज पहिलोपटक मैदान उत्रँदैछ।
हिजो भएका दुई खेलमा चितवन राइनोजले कर्णाली याक्सलाई ४ विकेटले पराजित गरेको थियो भने विराटनगर किङ्सले पोखरा एभेन्जर्सलाई ५३ रनले हराउँदै शानदार जित निकाल्यो। सोही खेलमा विराटनगरले एनपीएल इतिहासकै सर्वाधिक २२० रन बनाएको थियो।
यस वर्षको एनपीएलमा विराटनगर, जनकपुर, काठमाण्डौ, चितवन, कर्णाली, सुदूरपश्चिम, पोखरा र लुम्बिनी गरी आठ टोली प्रतिस्पर्धामा छन्। मंसिर १ गतेदेखि सुरु भएको प्रतियोगिताको फाइनल खेल मंसिर २७ गते निर्धारित छ।
