बझाङ: सशस्त्र प्रहरी बल नेपाल, आश्रित गुल्म बझाङको सातौँ स्थापना दिवस विविध कार्यक्रमसहित भव्य रूपमा मनाइएको छ ।
वार्षिकोत्सवको अवसरमा आन्तरिक खेलकुद प्रतियोगिता, विपद् उद्धार प्रदर्शन, रक्तदान अभियान, सरसफाइ तथा सचेतनामूलक कार्यक्रमहरू आयोजना गरिनुका साथै उत्कृष्ट कार्य सम्पादन गर्ने सशस्त्र प्रहरीहरूलाई सम्मान गरिएको थियो ।
कार्यक्रमका क्रममा सेवा निवृत्त सशस्त्र प्रहरीहरूलाई पनि सम्मान गरिएको थियो भने नागरिक समाजका अगुवा धर्मजंग बहादुर सिंह, कार्यक्रम सञ्चालक सबिता खड्का, पत्रकार तर्फ साइपाल एफएमकी समाचार प्रमुख तरुणा जोशी र कामना टेलिभिजन बझाङका प्रमुख उत्तम कुमार थापालाई विशेष सम्मान प्रदान गरिएको थियो ।
त्यस्तै, शिक्षक प्रकाश खड्का लगायत समाजसेवीहरूलाई समेत सम्मान गरिएको थियो ।
गुल्म परिसरमा आयोजित औपचारिक समारोहका प्रमुख अतिथि सशस्त्र प्रहरीका वरिष्ठ उपरीक्षक तथा सहायक वाहिनीपति वीरेन्द्र बहादुर ऐर रहनु भएको थियो ।
कार्यक्रममा दुर्गाथली गाउँपालिकाका अध्यक्ष दिल बहादुर थापा विशिष्ट अतिथि रहनु भएको थियो भने प्रमुख जिल्ला अधिकारी कैलास ठकुरी, विभिन्न सुरक्षा निकायका प्रतिनिधि, सरकारी कार्यालयका प्रमुख, जनप्रतिनिधि तथा सर्वसाधारणको उल्लेखनीय सहभागिता रहेको थियो ।
बक्ताहरूले सशस्त्र प्रहरी बलले देशभर शान्ति–सुरक्षा कायम गर्न, विपद् व्यवस्थापनमा अग्रणी भूमिका खेल्न र जनताको सेवा–सुरक्षामा निष्ठापूर्वक लागिरहेको प्रशंसा गरेका थिए ।
स्थापना दिवसको पूर्वसन्ध्यामा गुल्मले सुर्मा देवी मन्दिर र भवानी मन्दिरको सरसफाइ, रक्तदान कार्यक्रम, र विभिन्न विद्यालयमा सचेतना मूलक कार्यक्रमहरू सम्पन्न गरेको थियो ।
सशस्त्र प्रहरी बल नेपाल, आश्रित गुल्म बझाङका डीएसपी दुर्गा प्रसाद भट्टका अनुसार गुल्मले दैवी प्रकोप, विपद् उद्धार, सुरक्षासम्बन्धी सचेतना र समाजसेवामा उल्लेखनीय योगदान दिइरहेको छ।
उनका अनुसार, सशस्त्र प्रहरी बल सदैव “सेवा, सुरक्षा र समर्पण”को भावनासहित जनताको सहयोगमा खटिएको छ ।
२०७६ साल कार्तिक १३ गते स्थापना भएको सशस्त्र प्रहरी बल नेपाल, आश्रित गुल्म बझाङले सुरुवाती चरणमा कृषि ज्ञान केन्द्र बझाङको अस्थायी भवनबाट सेवा सुरु गरेको थियो ।
हाल भने गुल्मले २०८० साल भदौ १० गतेदेखि जयपृथ्वी नगरपालिका–६, नौरा स्थित आफ्नै स्थायी भवनबाट सेवा सञ्चालन गरिरहेको छ ।
