धनगढी- गत शुक्रबार र शनिबार परेको अविरल वर्षापछि आएको बाढी र पहिरोका कारण देशभर मृत्यु हुनेको संख्या ६० पुगेको छ।
प्रहरीका अनुसार मृतकमध्ये १९ पुरुष, २६ महिला र १५ नाबालक रहेका छन्। सबैभन्दा बढी जनहानि इलाम जिल्लामा भएको छ, जहाँ बाढी र पहिरोमा परेर ३७ जनाले ज्यान गुमाएका छन्।
त्यसैगरी पाँचथरमा ८, उदयपुरमा ३, खोटाङमा २, सुनसरीमा १, रौतहटमा ३, मोरङ, महोत्तरी, सिन्धुपाल्चोक र सिन्धुलीमा १–१ जना र काभ्रेपलाञ्चोकमा २ जनाको मृत्यु भएको प्रहरी स्रोतले जनाएको छ।
अविरल वर्षाका कारण देशका विभिन्न स्थानमा पहिरो र डुबानका घटना बढेका छन्। उद्धार तथा राहतका कार्य निरन्तर जारी रहेको जनाइएको छ।
