बझाङ- बझाङको केदारस्यूँ गाउँपालिका–१ चौडामका बासिन्दा पछिल्ला दिनमा बाघको त्रासमा बस्न बाध्य भएका छन्। आज दिउँसो करिब २ बजे बसन्ता खड्काका तीन वटा बाख्रा घर नजिकैको वनमा चरिरहेको अवस्थामा बाघले आक्रमण गरी मारिदिएको छ। चराउन लगिएका बाख्रा घर फर्काउने क्रममा घट्टाइजर नजिकै बाघको आक्रमणमा परि मरेका हुन् ।
यो घटनाले स्थानीय त्रासित बनेका छन्। त्यसो त यसअघि पनि यही क्षेत्रमा बाघको आतंक देखिएको थियो। करिब १५ दिनअघि ६ वटा बाख्रा बेपत्ता भएका थिए भने एक बाख्रा घाइते अवस्थामा फेला परेको थियो। लगातार बाघले बाख्रा मार्ने र बेपत्ता पार्ने घटनाले किसानलाई ठूलो नोक्सानी भएको छ।
दिउँसै बाघ गाउँ नजिकै देखिन थालेपछि अब मानिसमाथि पनि आक्रमण गर्नसक्ने आशंका बढेको स्थानीय निराजन खड्काको भनाइ छ। पशुपालनमार्फत घर खर्चको जोहो गरिरहेका गाउँलेलाई अहिले गोरु बाख्रा चराउनसमेत डर लाग्ने अवस्था आएको छ।
स्थानीयवासीले सम्बन्धित निकायको ध्यानाकर्षण गराउँदै वन्यजन्तुको व्यवस्थापन र सुरक्षा उपाय अवलम्बन गर्न माग गरेका छन्।
Advertisement
